Pas fitores historike të partisë së ekstremit të djathtë, AfD në landin e Saksoni-Anhalt, vëmendja në Gjermani është zhvendosur te profili i disa prej deputetëve të rinj të partisë. Sipas The Guardian, mes 39 të zgjedhurve të AfD-së në parlamentin e landit ka një ish-oficer të Stasi-t, një ish-aktor filmash pornografikë, persona nën hetim për lidhje me organizata neo-naziste dhe figura me lidhje pro-Kremlinit.
Një prej deputetëve të sapozgjedhur, 78 vjeç, ka pranuar se ka punuar për Ministrinë e Sigurisë së Shtetit të Gjermanisë Lindore, Stasi, ku merrej edhe me qytetarët që kërkonin të arratiseshin nga RDGJ-ja. Përzgjedhja e tij e tij është kritikuar nga organizatat që përfaqësojnë viktimat e diktaturës komuniste.
The Guardian shkruan gjithashtu se një tjetër deputet i AfD-së rezulton të ketë luajtur më herët në filma pornografikë dhe është dënuar për vjedhjen e një sasie të madhe çarçafësh dhe materialesh të tjera nga një hotel. Ai është përfshirë edhe në një çështje lidhur me falsifikimin e dokumenteve shkollore, megjithëse pretendon se më pas është rikthyer në universitet pas një beteje ligjore.
Dy deputetë të tjerë janë nën hetim për dyshime se kanë tentuar të vazhdojnë veprimtarinë e Artgemeinschaft, një organizatë neopagane e ekstremit të djathtë, e ndaluar nga autoritetet gjermane dhe e lidhur me ide nacionaliste e antisemite. Njëri prej tyre po hetohet gjithashtu për një çështje që lidhet me armët. Të dy i mohojnë akuzat.
Sipas raportimit, hetime të mediave gjermane kanë zbuluar gjithashtu lidhje të disa figurave të AfD-së me organizata të tjera të ekstremit të djathtë, përfshirë grupin tashmë të ndaluar “Homeland-Loyal German Youth”. Mes personave të lidhur me grupin parlamentar është përmendur edhe një këshilltar që ka shkruar një biografi të përshkruar si një “homazh ndaj nacional-socializmit”.
Në listën e deputetëve të rinj ka edhe figura me lidhje pro-ruse, si dhe persona që kanë zhvilluar kontakte me lëvizjen MAGA në Shtetet e Bashkuara. AfD-ja ka premtuar kufizim të fortë të emigracionit dhe rivendosjen e marrëdhënieve më të afërta me Moskën.
Kreu i grupit parlamentar të AfD-së në land, Ulrich Siegmund, reagoi me ironi ndaj pyetjeve për biografitë problematike të deputetëve, duke i quajtur dy prej tyre “djemtë e këqij” dhe duke thënë se partia do të presë përfundimin e hetimeve përpara se të marrë një qëndrim.
Edhe vetë Siegmund është përfshirë në polemika pasi, duke folur për hapjen e një fabrike izraelite armësh në land, lidhi nevojën për prodhim armësh me ofensivën e planifikuar të AfD-së për “riemigrim” dhe dëbime. Socialdemokratët e akuzuan se po përdorte një gjuhë që sugjeronte dhunën si mjet politik.
AfD fitoi afro 44% të votave në Saksoni-Anhalt dhe 39 vende në parlamentin me 83 deputetë, duke mbetur vetëm tre mandate larg shumicës absolute. Deri tani, partitë tradicionale kanë refuzuar të bashkëpunojnë me të, ndërsa protesta kundër AfD-së janë planifikuar në më shumë se 20 qytete gjermane.
