Partia për Drejtësi, Integrim dhe Unitet e drejtuar nga Shpëtim Idrizi rrezikon të prekë fundin. Në këtë legjislaturë PDIU ka mbetur zyrtarisht pa asnjë përfaqësues në Kuvendin e Shqipërisë, pasi 3 deputetët e Partisë për Drejtësi, Integrim dhe Unitet, Reme Lala, Dritan Bici dhe Elena Xhina të dalë nga zgjedhjet e fundit parlamentare të vitit 2017 janë larguar prej kohësh nga kjo parti.
Po ashtu PDIU nuk ka më akses as në pushtin vendor, pasi bashkitë që ajo drejton nuk i ka më prej 26 qershorit të vitit 2019. Por këta dy tregues janë vetëm maja e Ajsbergut e asaj që shihet, pasi gazeta ka mësuar se janë një duzinë arsyesh që po çojnë partinë e Idrizit drejt falimentimit.
Partia e Idrizit rrezikon të prekë fundin
Arsyeja e parë që Partia për Drejtësi, Integrim dhe Unitet po shkon drejt greminës është ndryshimi i Kodit Zgjedhor, i cili i ka hapur rrugë hapjes së pjesshme të listave dhe heqjes së koalicioneve parazgjedhore.
Në zgjedhjet e fundit parlamentare të vitit 2017 PDIU hyri e vetme në garë, për shkak se pakti i arritur mes Ramës dhe Bashës i gjeti të papërgatitura partitë politike, duke bërë që për shkak të garës së fortë, kjo parti mori vetëm 3 mandate, ndërsa kreu i saj Shpëtim Idrizi nuk arriti të vishte dot kostumin e deputetit edhe pse për hir të së vërtetës komunitet çam është i madh në Shqipëri.
Kështu që nisur nga fakti që në zgjedhjet parlamentare të 25 prillit të vitit 2021 partitë politike do të hyjnë pa koalicione ose me lista të përbashkëta, gjasat janë që partia më e dëmtuar të jetë ajo e Shpëtim Idrizit. Kjo për shkak se ka zëra se kryedemokrati Lulzim Basha në listën e Partisë Demokratike mund të fusë vetëm kryetarët e partive aleate që futi edhe në zgjedhjet e 2017 si Dashamir Shehin, Fatmir Mediun, Vangjel Dule apo Nard Ndokën. Ndërkohë që Partia për Drejtësi, Integrim dhe Unitet është e dënuar të hyjë në zgjedhje ose e vetme ose me Lëvizjen Socialiste për Integrim.
Arsyeja e dytë është se shumë figura me reputacion që kanë milituar pranë PDIU si ish-deputeti Aqif Rakipi dhe që kanë elektorat shumë si në qarkun e Elbasanit, ka gjasa që t’i shikojmë krah Partisë Socialiste, duke i dhënë kështu goditje nën brez Idrizit.
Po ashtu, për shkak se 3 deputetë aktualë që kanë dalë nga logoja e Partisë për Drejtësi, Integrim dhe Unitet, pritet të garojnë ose të pavarur ose nën siglën e PS në zgjedhjet e ardhshme duke e përçarë kështu elektoratin e PDIU dhe rrjedhimisht duke e çuar këtë parti drejt falimentimit.
Ndërsa arsyeja e tretë është fakti se aktualisht komuniteti çam është i përçarë dhe se janë shumë fraksione dhe parti të krijuara nga individë të ndryshëm që kanë rezerva dhe janë kritikë ndaj Shpëtim Idrizit, të cilin e akuzojnë se ka tradhtuar dhe braktisur kauzën çame.
Tahiri: Do jem në Parlament dhe do përfaqësoj çamët
Njëri prej tyre është ish-deputeti Dashamir Tahiri, i lënë jashtë listave të kandidatëve të Partisë Demokratike në procesin që po ndodh në PD sa u takon zgjedhjeve parlamentare të 25 prillit të vitit 2021. Zoti Tahiri ka marrë pjesë në përurimin e memorialit të luftëtarit të Pavarësisë dhe Çështjes Kombëtare, Muharrem Rushiti në qytetin e Sarandës, ndërsa ka deklaruar se do të garojë në zgjedhjet e 25 prillit për të qenë siç u shpreh ai një përfaqësues i denjë i komunitetit çam në Parlament.
“Unë asnjëherë nuk kam qenë ish-deputet. Po të isha për ish-deputet, kisha shkuar në Parlament siç shkuan të tjerët e kisha derën e hapur. Këtë radhë do të bëhem deputet. Politika shqiptare është kjo politikë e 30 viteve që ka si të mirat dhe të këqijat e saj.
Por unë kam ndjekur politikën që u përket çamëve, do të jem përfaqësues i çamëve dhe nuk do ta lë parlamentin pa përfaqësues me dinjitet çam”, deklaroi Tahiri. Kujtojmë që në qarkun me 12 mandate deputetësh të Vlorës, u propozuan 39 kandidatë potencialë, ku ra në sy mungesa e ish-deputetit Tahiri në degën e Sarandës, i cili thumboi në atë kohë PD-në në rrjetet sociale duke thënë se nuk bëhet sahanlëpirës e do të vazhdojë rrugën e tij politike.