Partitë e vogla kanë rritur presion, duke paralajmëruar krijimin e një poli të tretë politik. Kryetari i PAA-s, Agron Duka, tha se në kushtet kur dy partitë kryesore nuk ndryshojnë kodin zgjedhor, e vetmja zgjidhje për tu faktorizuar është bashkimi i partive të vogla. Ndërsa Koço Kokëdhima, akuzoi Bashën si të paaftë për të drejtuar opozitën.
Partitë e vogla po shkojnë drejt një poli të tretë politik në zgjedhjet vendore, me qëllim maksimalizmin e votave dhe peshës elektorale.
Pjesë e këtij poli pritet të jetë edhe Partia Agrare Ambjentaliste, ndërsa kryetari Agron Duka, tha se vetëm në këtë formë mund ti bëhet ballë kodit elektoral që ai e quan diskriminues.
Duka: Nëse duam të shmangim kasaphanet e deritanishme elektorale në kurriz të votave tona, bashkimi mbetet rruga e vetme.
Ndërsa, kreu i Partisë Zgjidhja, Koço Kodhëima, akuzoi ashpër dy partitë e mëdha, duke theksuar se atyre u intereson të mos bëjnë ndryshime, pasi sipas tij vjedhin dhe cënojnë në vazhdimësi proceset.
Kokëdhima foli për protestat e studentëve.
Kokëdhima: Nuk ka përmbushje të kërkesave të tyre nëse nuk çlirohet Shqipëria, nëqoftëse nuk rivendoset Republika, nëqoftëse nuk rivendosen zgjedhjet në Shqipëri, nëqoftëse nuk i kthehet sovraniteti popullit tonë.
Kokëdhima akuzoi ashpër Lulzim Bashën, duke e cilësuar të paaftë si lider, ndërsa tha se po tallet me popullin opozitar.
