Pas prokurores Elsa Gjeli, Edi Rama do godasë një gjyqtare. Bëhet fjalë për gjyqtaren Semiramis Hoxholli, aktualisht me detyrë në Gjykatën Administrative të Shkallës së Parë Tiranë.
Një ankesë e shtetasit Kostandin Basho, pronar i truallit ku është ndërtuar Kulla “Alban Tower”, nga Alban Xhaferri, përballë godinës së Partisë Socialiste, ngjitur me Gjykatën e Lartë, është kthyer në objekt gjykimi administrativ, që është marrë në shqyrtim nga Semiramis Hoxholli.
Pronari i truallit ka akuzuar “Al&GI” sh.p.k. dhe IMT-në e Bashkisë Tiranë për shtesa pa leje në gjerësinë dhe gjatësinë e kullës. Pas ankesave të shumta të Bashos, shoqëria “Al&GI” sh.p.k., ndërtuese e kullës “Alban Tower”, u gjobit nga IMT-ja që njëkohësisht nxori edhe një urdhër prishjeje të shtesave të kryera nga ndërtuesi.
Kompania “Al&GI” e Alban Xhaferit ankimoi vendimmarrjen e IMT-së në Gjykatën Administrative të Shkallës së Parë Tiranë, ku gjyqtarja Semiramis Hoxholli e “pezulloi” vendimin e IMT-së së Bashkisë Tiranë duke vendosur një masë sigurimi padie deri në përfundimin e gjykimit.
Gjyqtarja, kur ka pezulluar vendimin e IMT-së, ka argumentuar në vendim se “ka një rrezik potencial për sigurinë e qytetarëve dhe diplomatëve që janë futur brenda banesave dhe banojnë apo kanë zyra, si dhe është një shkelje e madhe për mbajtjen peng të zhvillimit dhe përfitimit të, mbi të cilën është ngritur kulla ‘Alban Tower’.”
Ky vendim është vënë në fokusin e kryeministrit Rama, dhe bashkë me të edhe gjyqtarja 40-vjeçare nga Elbasani, Semiramis Hoxholli.
Çfarë përfaqëson Kulla “Alban Tower”?
Më 13 maj 2023 u inaugurua Kulla “Alban Tower” në shqip “Kulla Alban”. Në këtë inaugurim mori pjesë vetë Kryeministri i Shqipërisë Edi Rama, bashkë me arkitektin projektues të saj, Marco Casamonti. Pas kullës qëndron Albam Xhaferri. Kjo kullë iu dha për projektim Marco Casamontit, me studion e tij Archea Associati, pasi u përzgjodh me një konkurs ndërkombëtar në fillim të viteve 2000. Kulla prej 105 metrash, mbi të cilën është ndërtuar edhe një brez uljeje helikopteri, mbaroi pas 17 viteve ndërtim, për shkak të konflikteve të pronësisë.
Magjistratet e Elbasanit
Elsa Gjeli 14.8.1988: Prokurore, në Prokurorinë Shkodër
Semiramis Hoxholli 13.5.1985: Gjyqtare, në Gjykatën Administrative të Shkallës së Parë Tiranë
Të dyja lindur, rritur në Elbasan, të dyja magjistrate me shkollë Magjistrature. Të dyja, në fokusin e Kryeministrit. Njëra e sapodiplomuar në vitin 2024 e patestuar nga vettingu “i hekurt”, dhe tjetra e diplomuar në 2016, në vitin kur vettingu hyri në fuqi.
Por gjyqtarja Semiramis Hoxholli, edhe pse filloi punën si gjyqtare në vitin 2017, u shkarkua në vitin 2021 nga KPK, për shkak të vëllait që e kishte të dënuar në Greqi në vitet ’90. KPA e cilësoi të padrejtë vettingun e magjistrates Hoxholli duke e shfuqizuar vendimin e KPK-së, pasi e gjeti të pavend vettingun e një magjistrateje që kishte filluar punë në të njëjtin vit kur ligji i vettingut kishte hyrë në fuqi.
Karrierat e të dyja magjistrateve janë vënë në “thepin” e Kryeministrit, për shkak të “100 ndërtimeve pa leje” të Thethit dhe “lartësimit” pa leje të “Alban Tower”, të dyja objekte që i kanë shpëtuar “syve” të qeverisë, strukturave dhe njerëzve të saj.
Kush do bëhen kurban për këto ndërtime të paligjshme? “Motrat” magjistrate nga Elbasani, apo 100 administratorët e bashkive, që do shkarkohen se ngatërruan projektin e 100 fshatrave me leje, me 100 fshatrat pa leje – i pari në Theth!
