Teksa Bashkimi Europian dhe amerikanët po rinisin presionet për të nisur goditjet e bujshme ndaj krimit të organizuar dhe korrupsionit, institucionet shqiptare janë bërë dje bashkë.
Kreu i Shërbimit Informativ, Helidon Bendo; Kryeprokurori, Olsian Çela; kreu i SPAK, Arben Kraja; drejtori i Policisë, Ardi Veliu; ministri i Brendshëm, Sandër Lleshaj; ministrja e Drejtësisë, Etilda Gjonaj dhe ministrja e Financave, Anila Denaj janë mbledhur dje bashkë në Pallatin e Kongreseve.
Mbledhja është mbajtur larg syrit të medias, ndërsa nuk ka pasur asnjë reagim se cili ishte qëllimi i saj. Takimi erdhi pak pasi Departamenti Amerikan i Shtetit publikoi raportin mbi terrorizmin, ku kërkonte më shumë punë nga ana e autoriteteve shqiptare. Fakti që institucionet kyçe në vend janë bërë bashkë, është një sinjal se diçka gatuhet në prapaskenë.
Sipas informacioneve, në atë takim janë shqyrtuar të gjithë temat, nga terrorizmi, te OFL, krimi i organizuar, kanabisi e deri te korrupsioni. Duhet theksuar se pak ditë më parë Kongresi Amerikan doli me një rezolutë ku kërkonte nga autoritetet shqiptare që të mbyllej ambasada iraniane, pasi disa përfaqësues të saj u përfshinë në skema terroriste. Shqipëria ndodhet në një situatë shumë delikate.
Bashkimi Europian ka vendosur 15 kushte që duhet të përmbushen brenda mbledhjes ndërqeveritare, por theksi kryesor është vendosur te lufta ndaj krimit të organizuar, korrupsionit dhe te hetimi i dosjeve për blerjen e votave. Kroacia, Rumania kanë treguar se u bënë pjesë e BE vetëm falë sistemit të drejtësisë. Pas arrestimit të ish-kryeministrave dhe të qindra funksionarëve të tjerë, u bë anëtarësimi. Mbledhja e Parlamentit Europian pak ditë më parë ishte një sinjal i qartë se pa përmbushur këto kushte nuk do mund të ketë hapje negociatash.
Ndikimet e huaja
Pak ditë më parë Parlamenti Europian mbajti një seancë për vendin tonë ku u analizuan 15 kushtet e miratuara nga Këshilli i BE. Ndër të tjera aty kërkohej dhe goditja e krimit. “Lufta kundër krimit të organizuar dhe hetimi i kujtdo që është përfshirë në shitblerjen e votave janë 2 nga 15 kushtet e BE që Shqipëria duhet të përmbushë përpara nisjes së konferencës së parë ndërqeveritare për negociatat e anëtarësimit”, tha eurodeputeti Gahler. Nga ana tjetër duhet theksuar se një tjetër fushë ku ndërkombëtarët kërkojnë të bëhet kujdes është ajo e ndikimit të huaj. SHISH në raportin vjetor ka treguar se vendet e huaja tentojnë të ndikojnë në vendin tonë, ndërsa PE kërkoi që të bëhet kujdes nga Kina e Rusia.
Eurodeputeti Waitz Tomas teksa ngriti shqetësimin se në Ballkan ka influencë ruse dhe kineze, u ndal tek thellimi i reformave nga ana e qeverisë shqiptare. Sipas tij, duhet përshëndetur fakti që nën drejtimin e kryeministrit Edi Rama Tirana zyrtare ka zgjidhur problemin e minoritetit me ligj. “Ne nuk jemi të lumtur për influencën e huaj në Ballkan, cilado qofshin ato: ruse, kineze etj. Shqipëria po bën më të mirën për të plotësuar kushtet, sikundër është respektimi i minoriteteve. Problemi i minoriteteve nuk është vetëm juridik. Qeveria shqiptare duhet të bëjë më shumë në terren për të qetësuar situatën”, deklaroi eurodeputeti Tomas. Pra duket se dje institucionet kyçe ligjzbatuese janë bërë bashkë dhe sinjalet janë se shumë shpejt do kemi zhvillime të bujshme.