Pas tre muajsh pune intensive me ndihmën e një eksperti të posaçëm të FBI amerikane, Komisioni i Pavarur i Kulaifikimit (KPK, ose shkalla e parë e vettingut) ka zbuluar fakte skandaloze në veprimtarinë dhe pastërtinë e figurës së ish-Kryeprokurorit Adriatik Llalla.
Kjo e ka detyruar këtë organ, të nis menjëherë punën për përgatitjen e padisë, që do i hapte rrugë fillimit të ndjekjes penale kundër ish-kryeprokurorit Llalla.
Sipas burimeve mësohet se brenda KPK-ës, persona që po merren me çështjen në fjalë, janë duke i dhënë dorën e fundit dosjes voluminoze, dhe është çështje kohe, që kërkesa të depozitohet pranë organit të prokurorisë, të cilin zoti Llalla e ka drejtuar gjatë 5 viteve të kaluara.
I pyetur mbrëmë gjatë emisionit “Opinion” të gazetarit Blendi Fevziu, Ministri i Brendshëm Xhafaj tregoi se: “një zyrtar i FBI-së ka qëndruar në Shqipëri për tre muaj dhe u largua vetëm para pak ditësh”.
Ai nuk pranoi të fliste arsyet e vërteta se pse zyrtari amerikan ndodhej këtu, por me sa duket bëhet fjalë për personin që është marrë direkt me hetimin e çështjes Llalla. Këto fakte janë referuar edhe në Departamentin Amerikan të Shtetit.
“A do dëgjojmë ndonjë lajm të madh, sepse sa herë që ikin ata…?”, pyeti Fevziu, ndërsa Xhafaj u përgjigj shkurtimisht: “Do dëgjoni muajin tjetër”.
Ikja e ekspertit të FBI nga Shqipëria, përkon me dy momente kyçe, gjurmët e të cilave të çojnë tek fakti, se tashmë fati juridik i Adriatik Llallës është i paracaktuar, për shkak të provave që me sa duket janë vërtetuar plotësisht.
