Deputetët e Partisë Socialiste kanë shpërthyer ditën e djeshme me akuza të forta ndaj ish-kryeministrit Sali Berisha, sa i takon sa i takon firmave piramidale të 1997 dhe situatës në tersi për këtë viti të mbrapshtë. Të shumta kanë qenë sulmet dhe akuzat e socialistëve në adresë të ish-presidentit të asokohe. Por më i ashpër dje është treguar deputeti i PS për qarkun e Fierit, Bujar Çela. Gjatë një prononcimi të shkurtër për gazetën “SOT”, ligjvënësi socialist e ndali theksin tek roli i Berishës dhe se sa ishte i përfshirë ai në firmat piramidale.
Çela u shpreh i bindur se Berisha ishte ideatori dhe organizator i firmave piramidale. Për të mbështetur akuzat e tij, deputeti socialist shtoi më tej se Partia Demokratike nën udhëheqjen e Berishës dhe shpurës së tij, ka përvetësuar pasuritë e shqiptarëve, jo vetëm gjatë vitit 1997 por edhe përgjatë gjithë kohës që Berisha ka pasur pushtet dhe ka drejtuar vendin. “Jo vetëm i përfshirë por dhe organizatore dhe garant i tyre deri në alibinë që paratë e shqiptareve janë të pastra e deri tek konkluzioni që këtë e bënë komunistët. Kur ai dhe Partia Demokratike qeverisnin e digjnin e përvetësonin, madje privatizonin çdo pasuri publike dhe me sloganin “Tokë, pronë e xanun”.
Firma piramidale fantazmë që ishin xhepi i Berishës dhe i të gjithë hajnave të tij”, deklaroi deputeti socialist i Fierit, Bujar Çela. Po si nisën firmat piramidale? Skemat piramidale në Shqipëri ishin skema Ponzi që degjeneruan rebelimin e vitit 1997. Nisën veprimtarinë e tyre së pari më 1991. I pari që hapi një firmë piramidale ishte Hajdin Sejdia, asokohe këshilltar ekonomik i kryeministrit Fatos Nano. Pasi nisi punën për ndërtimin e një hoteli në Tiranë, u largua me disa miliona dollarë. Vendi mbeti i hapur për themelet dhe për vite me radhë u njoh si Gropa e Hajdin Sejdisë.
Pas kësaj disa kreditorë u likuiduan por shumica jo. Besohet se pjesa më e madhe e shumave mbahet ndër bankat e huaja. Një tjetër firmë ishte “Sudja”. Kjo firmë u krijua në vitin 1993 nga Maksude Kadëna e njohur si Sudja, rome që kishte punuar në fabrikën e këpucëve. Kjo firmë ekzistoi në gjysmë-ilegalitet deri në vitin 1996, kur dy javë para zgjedhjeve u regjistrua tek e njëjta gjykatë dhe gjyqtare ku u regjistruan Xhaferri dhe Populli.
