Kryeministri Edi Rama ka komentuar edhe dëmet e shkaktuara gjatë protestave, duke thënë se ato materiale mund të riparohen shpejt, ndërsa më shqetësuese sipas tij janë pasojat politike dhe shoqërore të dhunës.
Rama u ndal veçanërisht te gurët e shkulur dhe të përdorur kundër efektivëve, duke i cilësuar si mjete potencialisht vdekjeprurëse. Ai akuzoi gjithashtu një grup prej rreth 200–300 personash të maskuar se nuk kanë lidhje me studentët dhe se, sipas tij, janë të paguar për të ushtruar dhunë.
“Patjetër që dëmet nuk janë të vogla, por ndreqen dhe ndreqen shpejt. Të tjera janë dëme të mëdha. Kam qenë pak i përfshirë dhe fushën e kanë pasur të lirë, ata që e fillojnë ditën dhe e mbarojnë me dhunë. Nuk dëgjon askënd që ta dënojë dhunën qartësisht. Ky është një nga mijërat gurë të shkulur për t’u hedhur mbi policinë. Është praktikisht një armë, që mund të bëhet vdekje prurëse. Imazhet që tregojnë televizionet, kur shfaqin atë të ashtuquajturin grupin e zjarrit, atë 200, 300 e maskuar, që nuk kanë asnjë lidhje me studentët, por që është aty e paguar, nuk i shohin këto”, theksoi ai.
