Reforma në administratë vijon të jetë në fokus të qeverisë. Pak ditë më parë u miratua strategjia për ta kryer më sukses këtë reformë gjatë periudhës 2018-2020, por dje Këshilli i Ministrave ka vendosur që të kryejë edhe disa ndryshime të tjera. Sipas një vendimi të botuar në Qendrën e Botimeve Zyrtare, qeveria ka vendosur që më ndryshimet e reja, gjatë këtyre dy viteve, tri ministri të përfshihen nga një ristrukturim rrënjësor.
“Pilotimi i metodologjisë së SIGAM për ristrukturimin në 3 sisteme ministrore. Vënia në zbatim e modelit të ri të organizimit të institucioneve të varësisë dhe miratimi ligjor i tyre. Përkufizimi i tipologjisë standarde të organizimit të institucioneve të varësisë dhe miratimi ligjor i tyre”, thuhet në një ndër objektivat e qeverisë, i cili ka si qëllim që të rishikojë funksionimin dhe organizimin e brendshëm të institucioneve të administratës shtetërore.
Një tjetër objektiv që qeveria synon ta arrijë përmes ndryshimeve të kryera në strategjinë për reformën në administratë është edhe rishikimi dhe miratimi i strukturës së re të pagave. Me pak fjalë, Këshilli i Ministrave ka vendosur që sistemi i pagave për punonjësit e administratës shtetërore të ndryshojë, ku në fokus do të jetë edhe motivimi e stimulimi i tyre. “Hartimi dhe miratimi i një dokumenti për politikat në sistemin e pagave dhe miratimi i strukturës së re të pagave. Miratimi i vendimeve të reja për pagat dhe zbatimi i strukturës së re.
Rishikimi i raporteve mes pagës maksimale dhe pagës minimale/mesatare në administratën publike, me qëllim ruajtjen e një piramide objektive të pagave dhe motivimin e pozicioneve drejtuese, si edhe diversifikimi i klasifikimit sipas përmbajtjes së punës”, sqarohet në strategjinë e qeverisë.
Ndryshon mënyra e rekrutimit
Një tjetër pikë që qeveria synon ta ndryshojë me qëllim që reforma në administratë të jetë sa më e suksesshme është edhe mënyra e rekrutimit të punonjësve. Në planet e qeverisë është që të forcohet kapaciteti i Departamentit të Administratës Publike dhe strukturat e menaxhimit të burimeve njerëzore për të udhëhequr strategjikisht reformën e shërbimit civil.
“Përmirësimi dhe lehtësimi i komunikimit dhe ndërveprimit midis institucioneve publike dhe qytetarëve (krijimi i HUB-it për menaxhimin e burimeve). Forcimi i kapaciteteve të nëpunësve në menaxhimin e burimeve njerëzore dhe të anëtarëve të komisionit përzgjedhës për të përmirësuar më tepër procesin e rekrutimit. Rishikimi i përshkrimeve të punës dhe hartimi i përshkrimeve të punës. Kryerja e vlerësimeve “ad-hoc” për të marrë opinionin e aplikantëve mbi procesin e rekrutimit dhe marrja e masave për të adresuar çështjet që dalin nga vlerësimi.
Bashkëpunimi me institucionet e arsimit të lartë për të përthithur studentët më të mirë në administratën publike (qendrore dhe vendore)”, thuhet në strategjinë e qeverisë. Po ashtu, në strategji bën pjesë edhe zhvillimi i kuadrit për vlerësimin e cilësisë së ofrimit të shërbimeve publike. “Hartimi dhe miratimi i kuadrit për vlerësimin e cilësisë së ofrimit të shërbimeve publike. Monitorimi i cilësisë së ofrimit të shërbimeve publike pranë qendrave të integruara dhe sporteleve të shërbimeve ADISA. Pilotimi i zbatimit të kuadrit për vlerësimin e cilësisë së ofrimit të shërbimeve publike pranë institucioneve të qeverisjes vendore”, vijon më tej strategjia e qeverisë për reformën në administratë./Sot/
