Plani Shqipëria fuqi e madhe ushtarake në Ballkan?! SHBA, Turqia , Italia armatosin ushtrinë shqiptare!

Tre shtetet e fuqishme armë të rënda dhe të lehta për ushtrinë shqiptare, marrëveshja më Turqinë po zbatohet në fshehtësi, Ankaraja sjell pajisjet më të fundit ushtarake për ushtrinë shqiptare, Shqipëria ka dyfishin e blindave që ka Serbia

Shtetet e Bashkuara të Amerikës, Turqia dhe Italia janë të interesuara që Shqipëria të bëhet fuqia më e madhe ushtarake në Ballkan, për të lënë pas Serbinë dhe Greqinë, të cilat shihen më shumë si aleate të Rusisë dhe vende që janë zgjeruar në kurriz të fqinjëve. Në bazë të një marrëveshje, SHBA, vetëm gjatë vitit 2017, u dhuroi ushtrisë shqiptare 250 blinda modernë. Ardhja e blindave është mbajtur sekret. Me këtë dhuratë, numri i blindave të ushtrisë shqiptare shkon në 950, dy herë më shumë se sa Serbia.

Automjetet e blinduara për transport strategjik, të dhuruara nga SHBA, janë të markës HMMËV 1114 dhe kanë shpejtësi maksimale 125 km/h, kapacitet mbajtës 1+3+1 pushkatar, peshojnë 6 ton si dhe kanë autonomi lëvizjeje 443 km. Mjetet e blinduara janë të pajisura me sistem të mbajtjes së armëve mitraloz të rëndë dhe mitraloz të lehtë si dhe granatëhedhës. Në të njëjtën kohë, Italia po furnizon ushtrinë shqiptare me 5000 armë automatike te kalibrit të NATO-s duke hequr kështu nga shërbimi kallashnikovët rusë ose kinezë.

Nga ana tjetër, po zbatohet një marrëveshje me Turqinë, për armatosjen e ushtrisë shqiptare dhe trajnimin e ushtarakëve për luftime. Palët kanë rënë dakord që marrëveshje të zbatohet në fshehtësi. Në marrëveshjen e fshehtë thuhet: “Pajisjet të blihen nga një kompani turke që operon në industrinë ushtarake (me të njëjtat kushte cilësore dhe lehtësime financiare që prokurojnë edhe Forcat e Armatosura të Republikës së Turqisë) dhe, 90 për qind e shumës të paguhet nga pala turke dhe 10 për qind e shumës të paguhet nga pala shqiptare. Këshilli i Ministrave i Republikës së Shqipërisë nuk mund t’i transferojë materiale ose shërbime një shteti tjetër apo një pale të tretë, pa marrë më parë pëlqimin e qeverisë së Republikës së Turqisë”.

Kohë më parë, krahu i djathtë i Erdoganit, Ahmed Davutoglu, gjatë një vizitë në Tiranë, dha një mesazh të qartë, kur tha se Turqia kërkon rritjen e rolit të Shqipërisë në rajon dhe botë.

“Çdo sukses i Shqipërisë në të njëjtën kohë është sukses edhe për ne. Shqipëria do të ketë gjithmonë përkrahjen e Turqisë për të luajtur një rol më të rëndësishëm në rajon dhe në botë. Gjithmonë jemi bashkë me njëri-tjetrin. Flamujt e dy vendeve do jenë gjithmonë së bashku. Organizimi i takimeve të përbashkëta të dy qeverive do jetë një nivel i ri dhe një hap më i madh mes vendeve tona. Miqësia dhe bashkëpunimi vëllazëror do të institucionalizohen akoma më shumë. Për ne Shqipëria është një vend i hapur drejt rajonit”, tha Davutoglu. Ndërkohë Shqipëria pritet të rrisë buxhetin ushtarak çdo vit deri në masën 2% ose afërsisht diku të 400 milionë Euro me kërkesë të NATO-s./Pamfleti