Presidenti i Panamasë, José Raul Mulino ka nxituar të hedhë poshtë premtimin e Donald Trump se Shtetet e Bashkuara do të “marrin përsëri” Kanalin e Panamasë, pak pasi deklarata e tij u theksua edhe njëherë gjatë fjalimit në ceremoninë e inaugurimit të tij si President.
“Kanali është dhe do të vazhdojë të jetë i Panamasë dhe administrata e tij do të vazhdojë të jetë nën kontrollin panamez në lidhje me neutralitetin e tij të përhershëm”, tha Mulino në një deklaratë pas betimit të Trump.
Mulino gjithashtu hodhi poshtë pretendimin e Trump se Kina po “operon” kanalin, i cili lidh Detin e Karaibeve me Oqeanin Paqësor.
“Nuk ka prani të asnjë kombi në botë që ndërhyn në administratën tonë”, tha Mulino pa përmendur drejtpërdrejt Kinën.
Presidenti i Panamasë bëri thirrje për dialog për këtë çështje për të “sqaruar pikat e përmendura pa cenuar të drejtën” e vendit të tij, “sovranitetin total dhe pronësinë e Kanalit”.
Ndërkohë Autoriteti që menaxhon Kanalin e Panamasë i tha CNN se nuk ka një reagim për komentet e Trump.
Trump pretendoi gjatë fjalimit të tij inaugurues se Panamaja ka shkelur marrëveshjet e traktateve që kërkojnë neutralitet në operacionet e kanalit dhe anijet amerikane po taksohen rëndë sipas tij.
“Anijet amerikane po ngarkohen rëndë dhe nuk trajtohen në mënyrë të drejtë në asnjë mënyrë apo formë dhe kjo përfshin Marinën e Shteteve të Bashkuara. Dhe mbi të gjitha, Kina po operon Kanalin e Panamasë dhe ne nuk ia dhamë atë Kinës. Ne ia dhamë Panamasë. Dhe ne do e marrim sërish atë”, pohoi Trump.
