Lajmi për largimin e Smith u bë i ditur përmes një dokumenti të dorëzuar nga zyrtarët e Departamentit të Drejtësisë në Gjykatën Distriktuale të SHBA-së, gjykatëses Aileen Cannon.
Këshilltari special, Jack Smith, i cili ka përfunduar punën rreth dy hetime penale ndaj presidentit të zgjedhur amerikan, Donald Trump, ka dhënë dorëheqje nga Departamenti i Drejtësisë. Lajmi për largimin e Smith u bë i ditur përmes një dokumenti të dorëzuar nga zyrtarët e Departamentit të Drejtësisë në Gjykatën Distriktuale të SHBA-së, gjykatëses Aileen Cannon.
Ata i bënë thirrje asaj që të mos zvarrit urdhërin e gjykatës që ajo dha javën e kaluar, duke bllokuar përkohësisht publikimin e raportit përfundimtar që Smith ia dorëzoi drejtuesve të departamentit të martën. Zyrtarët e Departamentit të Drejtësisë argumentojnë se urdhri i Cannonit ka tejkaluar autoritetin e saj dhe se ajo nuk ka fuqi të ndalojë Prokurorin e Përgjithshëm, Merrick Garland të publikojë gjetjet e Smithit. Ndalesa e saj për publikimin e raportit të Smithit është e vlefshme deri të hënën.
Garland ka thënë se planifikon të publikojë vetëm pjesën e raportit të Smithit që trajton hetimin mbi përpjekjet e Trumput për të përmbysur zgjedhjet e 2020-ës. Ai ka deklaruar në dokumente gjyqësore se ka rënë dakord me rekomandimin e Smithit për të mbajtur të fshehtë pjesën tjetër të raportit, që lidhet me hetimin mbi posedimin e dokumenteve të klasifikuara nga Trump në Mar-a-Lago pas largimit nga detyra në vitin 2021. Kjo pjesë do të shpërndahet vetëm te një grup i kufizuar anëtarësh të Kongresit amerikan për shkak të përpjekjeve të vazhdueshme për të rinisur një çështje penale kundër dy aleatëve të Trumpit dhe ish-bashkëpandehurve të tij.
Dorëheqja e Smith përpara përfundimit të mandatit të presidentit amerikan, Joe Biden ishte e pritshme dhe ishte parashikuar nga zyrtarë të tjerë të Departamentit të Drejtësisë. Trump ka kërkuar vazhdimisht që Smith të ndiqet penalisht për trajtimin e çështjeve kundër tij dhe madje ka sugjeruar që ai të dëbohet nga Shtetet e Bashkuara.
Largimi i Smith shënon fundin e një prej kapitujve më të jashtëzakonshëm dhe të trazuar në historinë e Departamentit të Drejtësisë, që rezultoi me akuza të rënda penale ndaj Trumpit, i cili është presidenti i parë që përballet me ndjekje penale.
Megjithatë, të dyja çështjet e Smithit u bllokuan nga gjykatat. Cannon rrëzoi çështjen për dokumentet në muajin korrik, duke argumentuar se Garland nuk kishte autoritet për të emëruar Smithin. Ndërsa Gjykata e Lartë vonoi çështjen e zgjedhjeve të vitit 2020 për muaj të tërë ndërsa shqyrtonte pretendimin e Trumpit për imunitet presidencial, duke arritur në një vendim historik që vendos imunitet të gjerë presidencial. Përfundimisht, ishte rizgjedhja e Trumpit për një mandat të dytë ajo që i dha fund të dy çështjeve. Smith i braktisi ndjekjet penale pas shpalljes së Trumpit si fitues, duke cituar politikën e Departamentit të Drejtësisë kundër ndjekjes penale të një presidenti në detyrë. Kjo i hapi rrugën Smithit për të përmbledhur gjetjet e tij në raportin përfundimtar, të cilin e ka dorëzuar këtë javë.
Mosmarrëveshjet e ashpra ligjore mbi publikimin e raportit të Smith kanë vazhduar gjatë gjithë javës. Ndërsa Cannon, i emëruar i Trumpit, vendosi të ndalojë përkohësisht publikimin e raportit, zyrtarët e Departamentit të Drejtësisë i kanë kërkuar Gjykatës së Apelit të Rrethit të 11-të të Atlantës të heqë këtë urdhër.
Situata ka krijuar pasiguri mbi kohën kur publiku do të shohë edhe pjesën e raportit të Smithit që lidhet me zgjedhjet e vitit 2020. Garland ka deklaruar se nuk do ta publikojë atë për sa kohë që është nën një urdhër gjykate që e bllokon. Gjykata e Apelit ende nuk ka treguar se sa shpejt do të zgjidhë këtë çështje. Ndërkohë që fillimisht gjykata refuzoi përpjekjen e Trump dhe bashkëpandehurve të tij në Florida për të ndaluar raportin, ende nuk ka ndërhyrë për të ndryshuar urdhrin e Cannon, i cili ndalon publikimin deri të hënën në mbrëmje.
