Ka përfunduar protesta e sotme e 16 marsit, për të cilën po punohej prej javësh nga dy partitë kryesore opozitare, PD e LSI. Kjo protestë ishte masive por zgjati më pak se protesta e 16 shkurtit e cila nisi që në orën 10:00 e u mbyll në orën 16:00.
Sot, gjithçka nisi pas orës 11:00 dhe gjithçka përfundoi shumë shpejt. Pak minuta para mbylljes së protestës, Policia e Shtetit doli me një deklaratë, ku i vendoste ultimatum opozitës.
Permes një letre drejtuar Sekretarit të Përgjitshëm, Gazmend Bardhi, uniformat blu paralajmëronte se nëse për 5 minuta nuk do të ndërpritej protesta, atëherë policia do të ndërhynte forcërisht.
Edhe kreu i PD-së, Basha hodhi akuza mbi policinë, për të cilën theksoi se provokoi dhe tentoi të shpërndate turmën e njerëzve.
Deklarata e Policisë së Shtetit:
Nga protuestuesit po kryhen akte të rënda dhune ndaj punonjësve të policisë, po cënohet rendi publik dhe siguria e qytetarëve.
I NDERUAR ZOTI GAZMEND BARDHI !
Si organizator i tubimit , ju lutemi kërkoni nga protestuesit të ruajnë qetësinë. Protestuesit duhet të ndërpresin veprimet e dhunshme dhe të shpërndahen. Ju bëjmë thirrje të distancoheni nga këto veprime të dhunshme.
Veprimet e protestuesve janë të kundërligjshme dhe të dënueshme nga ligji penal.
Në rast se për 5 minuta nuk do të ndërprisni veprimet e kundraligjshme turma do të shpërndahet forcërisht nga Policia e Shtetit e cila do të përdorë forcën dhe mjetet e saj, sipas ligjit.
