Sali Berisha zgjodhi një tribunë ndërkombëtare për të paraqitur Shqipërinë me ngjyrat më të errëta të mundshme. Këtë herë ishte Asambleja Politike e Partisë Popullore Europiane në Vjenë, ku kreu i Partisë Demokratike nuk u mjaftua vetëm me kritika ndaj qeverisë, por e përshkroi vendin si një “narko-shtet”, pa zgjedhje të lira, me institucione të kapura, media nën kontroll dhe ekonomi të dominuar nga krimi.
Në monologun e tij, Berisha foli edhe për protestat që prej javësh zhvillohen në Tiranë dhe u përpoq t’i lidhte ato me kauzën që ai mbron që nga humbja e zgjedhjeve të 11 majit: krijimin e një qeverie teknike. Para drejtuesve të PPE-së, ai i paraqiti protestuesit si mbështetës të kësaj formule politike, duke kërkuar që edhe partitë simotra europiane ta mbështesin.
“Sot ju keni në rrugët e Tiranës prej një muaji, dhjetëra mijëra, qindra mijëra qytetarë dhe të rinj duke kërkuar fillimit dorëheqjen e qeverisë dhe një qeveri teknike për të përgatitur zgjedhje të lira dhe të ndershme. Mbështetja e kësaj proteste është me rëndësi jetike për të ardhmen e Shqipërisë në BE” tha Berisha.
LEXO EDHE:
Mero Baze: Protesta që dua(m)n!
Fjalimi në Vjenë ndoqi të njëjtën linjë që Berisha ka ndjekur në çdo dalje ndërkombëtare. Nga procesi zgjedhor te korrupsioni, krimi i organizuar, emigracioni, ekonomia dhe media, gjithçka u paraqit si provë e një shteti që, sipas tij, nuk funksionon. Madje, ai e cilësoi Shqipërinë “të vetmin narko-shtet në Europë”, një etiketim që nuk është i ri në retorikën e tij, por që kësaj here u artikulua përpara familjes më të madhe politike të qendrës së djathtë europiane.
“Sot vendi im është eksportuesi i parë i kanabisit në gjithë Evropën. Sot trafikantët shqiptarë të drogës janë transportuesit kryesorë të kokainës nga Amerika Latine në Evropë, dhe këto janë të provuara. Ata kontrollojnë 64% të tregut të kokainës në Mbretërinë e Bashkuar dhe më shumë se 40% të tregut të kokainës në Gjermani. Por miliardat e tyre vijnë në vend përmes kontejnerëve dhe autobusëve. Vetëm 10 ditë më parë, tre kontejnerë plot me euro u shkarkuan në portin e Durrësit. Eurot investohen në resorte turistike dhe në ndërtim. Dhe këto para droge kanë një efekt shkatërrues për kombin tim” tha Berisha.
Në përpjekje për të siguruar mbështetje politike nga PPE-ja, Berisha zgjodhi sërish ta ndërtojë argumentin e tij mbi portretizimin negativ të vendit që synon të mbyllë negociatat për anëtarësim në BE, ndërsa për rrugëtimin e Shqipërisë drejt Bashkimit Europian nuk foli asnjë fjalë.
