Ish-zëvendëskryeministri i Partisë Demokratike në vitet 1992-1995 Bashkim Kopliku, nëpërmjet një postimi në Facebook ka dalë hapur kundër partisë më të madhe opozitare që ka përfaqësuar dikur. Ai shprehet se PD e vitit 1991 dha kontribut më të madh në rrëzimin e Enverizmit.
Politikani thotë se merita e rrëzimit të enverizmit, por edhe e komunizmit, ishte më së shumti e vetë komunistëve, ndërsa pretendon se PS-në nuk e lidh gjë me komunizmin.
“Njësoj mund të thuhet edhe për socialistët: nuk i lidh gjë ata me komunizmin…
Duhet të shkëputemi nga trajtimi i politikës sot, me shkollën leniniste e staliniste të 1917.
Bota sot është krejt tjetër, e shumë nga ne, mbi 50-vjeçarët, duhet të ristrukturojmë, të përditësojmë konceptet e tyre…”, thekson Kopliku.
Deklarata e plotë në Facebook:
PD e 1991, dha kontribut më të madh në rrëzimin e Enverizmit.
Enverizmi u rrëzua nga pothuaj të gjitha shtresat e popullit shqiptar, e natyrisht edhe nga shumica e komunistëve, të cilët, pra shumica e komunistëve, e kishin kuptuar se i kishte ardhur fundi atij regjimi enverist, që natyrisht as komunist nuk ishte.
Pra, shumica e komunistëve e kishte kuptuar se edhe komunizmit i kishte ardhur fundi, edhe si teori, prandaj përfaqësuan, ose ide socialiste (që për komunizmin ishin njësoj kundërshtare–bile mos më shumë se ato të djathtat) ose idetë e partive popullore (të djathtave) evropiane.
Pra, merita e rrëzimit të enverizmit, por edhe e komunizmit, ishte si e komunistëve, që ishin shumica në Shqipërinë e 1990, si dhe e antikomunistëve etj.
Mund t’u duket si absurd kjo që po them, shumë prej atyre që sot i bien gjoksit duke thënë se “ne, antikomunistët” e rrëzuam enverizmin, duke synuar ekskluzivitet që nuk e kanë pasur fare, fare– bile mos qoftë e kundërta, që kontributi i antikomunistëve shqiptarë të shtresave, apo pasardhësve gjenetikë të antikomunistë të luftës së dytë botërore, të ketë pasur kontribut më të vogël…
Eksperienca ime e atyre viteve, por edhe e vrojtimet e reagimeve të shtresave të ndryshme pas 1990, më ka bindur se në 1991, se faktet janë sa shkrova më lart.
Edhe sot, nuk është e thënë se janë me bindje popullore (të djathta) ata që në Shqipëri kanë qenë antikomunistë para 1990. Jo, e djathta evropiane, nuk është detyrimisht ideologjia e atyre që burgosi e shtypi enverizmi. Jo, ata sot, në liri, mund të ishin njësoj, socialistë (kujtoni Myrsine Kokalarin, Skënder Muçon etj.) ose të djathtë (siç ishin ata që përkrahnin të drejtat e barabarta të të gjitha shtresave, e famshmja “alle Schichten”, barazi në mes të gjitha klasave, apo shtresave, e CDU të Mekelit në Gjermani e gjetkë).
Njësoj mund të thuhet edhe për socialistët: nuk i lidh gjë ata me komunizmin…
Duhet të shkëputemi nga trajtimi i politikës sot, me shkollën leniniste e staliniste të 1917.
Bota sot është krejt tjetër, e shumë nga ne, mbi 50-vjeçarët, duhet të ristruturojmë, të përditësojmë konceptet e tyre…
