Nga Flogert Muça
Lulzim Basha ka dalë sërish sot në një prononcim për mediat dhe ka sulmuar punën e policisë e cila dje pas një aksioni spektakolar arriti të bllokojë 613 kg kokainë me një vlerë 180 milionë dollarë. Goditja që policia i bëri krimit dje, renditet ndër më të mëdhatë e bëra ndonjëherë ndaj edhe pasqyrimi i këtij aksioni ishte i plotë në të gjitha mediat ndërkombëtare si një histori suksesi dhe pune të mirë në luftën kundër narkotikëve dhe krimit të organizuar.
Nuk ndenjën pa reaguar edhe SHBA-të që përgëzuan policinë dhe Shqipërinë për hapat pozitivë në luftën ndaj krimit dhe rikonfirmuan mbështetjen e tyre të pakursyer në këtë drejtim. BE gjithashtu përshëndeti aksionin e policisë duke u shprehur “Punë e paqme, vazhdoni përpara edhe më tej me luftën kundër krimit të organizuar”.
Prokurori Kombëtar i Antimafias dhe Antiterrorizmit në Itali Federico Cafiero De Raho gjithashtu përgëzoi institucionet për punën duke theksuar se ky aksion është një ndër rezultatet e para të strategjisë kundër krimit të organizuar dhe korrupsionit, të cilën Qeveria shqiptare po e zbaton fuqimisht, siç munda të mësoj dhe gjatë vizitës sime të fundit në Shqipëri, të realizuar me ftesë të Ministrit të Brendshëm.
I vetmi që sulmoi policinë dhe qeverinë që në momentin e parë të publikimit të aksionit të policisë ishte Lulzim Basha dhe Partia Demokratike. I cili përpos faktik që është në kundërshtim me të gjithë partnerët e mësipërm ka edhe një gabim të madh logjik në argumentin e tij.
Sipas Bashës, qeveria paska porositur kokainën dhe më pas ka bërë bllokimin e saj duke humbur 180 milionë euro. Logjika nul e Bashës në fakt tregon se lepuri mund të flejë në tjëtër vend.
Për sa kohë i vemti që i qan hallin trafikantëve të kokainës sot është Lulzim Basha, i bie që i lidhur me këta trafikantë të jetë Lulzim Basha?
Për sa kohë i vetmi që sulmon policinë pse kap dhe bllokon një sasi rekord kokaine duke dëmtuar rëndë trafikantët, është Lulzim Basha, i bie që i vetmi i dëmtuar në këtë histori është ai?
E në mos qoftë kjo e vërteta, atëherë me logjikë të thjeshtë i bie që Basha është i paaftë dhe nuk ka asnjë argument për të bërë opozitë serioze ndaj dhe bën të tilla gafa që e nxjerrin jo vetëm të pabesueshëm, por të bëjnë të mendosh mos ai vetë ose rrethi i tij politik është i përfshirë në të tilla trafiqe, për sa kohë i mbron me aq ëndje.
Të sulmosh policinë nuk është kurrë e shëndetshme për një demokraci, pasi kemi të bëjmë me rendin dhe sigurinë publike. Por ta sulmosh policinë edhe kur kryen një operacion spektakolar të përmasave të tilla si ai i djeshmi, është të duash të dalësh qesharak në rastin më të mirë ose i përlyer në atë më të keqin.
Nëse Bashës apo rrethit të tij i janë prishur pazaret nga super aksioni i djeshëm dhe kanë nxjerrë kryedemokratin të sulmojë policinë është një problem më vete që kërkon hetim. Ama, në rast se nga paaftësia e tij për të bërë opozitë reale del dhe këput të tilla brroçkulla duke sulmuar policinë pse bën punën e saj, PD vetë duhet të ripozicionohet nga kryetari i saj nëse nuk do të bëhet edhe më shumë gaz i botës.
