Kreu i Bindjes Demokratike Astrit Patozi në një intervistë për ‘Dosja’ ka folur për marrëdhënien që ka me deputeten Rudina Hajdari dhe pse kjo e fundit nuk u bë pjesë e partisë së re.
Patozi është shprehur se dyert e partisë Bindja për Rudina Hajdarin janë të hapura dhe se me të janë në komunikim të vazhdueshëm për të qenë pjesë e saj apo jo. Ai pranon se kanë diskutuar me Hajdarin dhe për çështjen e partisë.
Pjesë nga intervista:
-Meqë jemi te krijimi i partisë. U fol se deputetja Rudina Hajdari do ishte pjesë e partisë Bindja Demokratike. Pse u tërhoq ajo në minutat e fundit para se ju të dilnit publikisht me një parti të re? Marrëdhënia që keni tani me Hajdarin?
Fakti që ju thoni u përfol do të thotë që nuk folëm ne, nuk foli as zonja Hajdari , as dikush tjetër i partisë Bindja Demokratike, folën të tjerët. Ne kemi një komunikim shumë të mirë, kemi respekt për zonjën Hajdari dhe e kemi vlerësuar qëndrimin e saj në parlament dhe jashtë parlamentit, por sigurisht kjo është një parti që i ka dyer e hapura për zonjën Hajdari edhe për këdo tjetër që ka një vizion politik si ne.
-E keni diskutua me Hajdarin për këtë ide, për të qenë edhe ajo pjesë e partisë?
Ne kemi diskutuar edhe për këtë ide dhe Hajdari ka të gjithë të drejtën të marrë kohën e nevojshme për t’ju bashkuar ose jo kësaj partie. Theksoj se marrëdhënia me Hajdarin është shumë e mirë, shumë miqësore dhe jemi ne komunikim të vazhdueshëm.
