Protesta e opozitës së bashkuar, ditë pas dite, po zhduk LSI-në. Ndryshe nga sa ndodhi në javët e para, kur në krah të Lulzim Bashës ishte përherë edhe Monika Kryemadhi, që shpesh merrte fjalën pas liderit të PD-së, tani vizibilitet i LSI praktikisht është zhdukur.
Lulzim Basha ka marrë gjithë skenën: ai flet në publik, ai drejton protestën, ai fikson axhendën publikisht të gjithë opozitës, pra edhe atë të Monikës ku partia e saj nuk është as fasad opozitare, por një grup njerëzish pa ideale që vrapojnë pas turmave të PD-së, si mbështetës të opozitës, për tu shpërblyer nëse një ditë opozita e rrugës kap ndonjë copë pushteti!.
Rezultati i këtij eklipsi tashmë është i dukshëm edhe në sondazhe, që sinjalizojnë një rënie neto të pëlqimit për LSI dhe një ngritje të PD-së.
Agresioni i militantëve të PD-së ndaj një militanteje të LSI-së që kishte guxuar të valviste një flamur të LSI në protestën e dy javëve më parë, është prova se flamujt e vetëm që pranohen në shesh, janë ato të PD-së, ashtu siç edhe shihet nga transmetimet direkte të televizioneve.
Lëvizja ekstreme e presidentit Ilir Meta duke anuluar zgjedhjet e 30 qershorit, mund të jetë pjesë e planit të tij edhe për t’u kthyer protagonist dhe për t’i ridhënë rol dhe protagonizëm LSI-së që në duart e Monika Kryemadhit dhe Petrit Vasilit (dhe falë strategjisë cinike të Bashës dhe Berishës) po shkërmoqet.
Një proces i kundërt me atë që LSI mori në epokën e qeverisjes me Edi Ramën, kur partia e Metës u rrit në mënyrë konstante duke arritur deri në + 25% në zgjedhjet të 2017, çuditërisht ato qe sipas opozitës se bashkuar janë manipuluar.
Pra, Meta nuk duket se po vepron për të shpëtuar vendin nga kriza, por për të realizuar “planin e monitorimit” mbi reformën e drejtësisë premtuar nga opozita, por edhe për të shpëtuar partinë e tij nga zhdukja.
