Anglia do të hyjë në një bllokim të dytë kombëtar në ditët në vijim, ka njoftuar Kryeministri Britanik Boris Johnson.
Vendimi erdhi disa orë pasi Britania e Madhe kaloi një milion raste me koronavirus.
Mbyllja njëmujore do të hyjë në fuqi nga e enjtja pas një votimi parlamentar në fillim të javës së ardhshme, tha Johnson gjatë një konference shtypi të shtunën në mbrëmje.
“Ne duhet të veprojmë tani për të përmbajtur vrullin e vjeshtës”, tha ai.
Johnson u detyrua të bënte njoftimin të shtunën pasi planet e qeverisë dolën në gazeta të shumta kombëtare mbrëmjen e kaluar.
Plani kishte qenë fillimisht për të njoftuar masat të hënën.
Bllokimi përfshin mbylljen e lokaleve, restoranteve dhe bizneseve jo-thelbësore, duke përfshirë sallone flokësh dhe palestra. Shkollat, universitetet dhe terrenet e lojërave do të qëndrojnë të hapura.
Njerëzit do të jenë në gjendje të largohen nga shtëpitë e tyre vetëm për arsye specifike: arsimimi, puna (nëse nuk janë në gjendje të punojnë nga shtëpia), për të blerë ushqim, për arsye shëndetësore.
Qeveria po dekurajon të gjitha udhëtimet jo-thelbësore, megjithëse njerëzit do të jenë akoma në gjendje të udhëtojnë jashtë për punë, me kusht që të ndjekin rregullat e karantinës së Anglisë pas kthimit të tyre.
Masat do të zbatohen vetëm për Anglinë.
Mbyllja e re do të qëndrojë në fuqi deri më 2 dhjetor.