Kryeministri Edi Rama ka njoftuar se vizita e tij në Shtetet e Bashkuara, në kuadër të javës së Kombeve të Bashkuara, do të nisë këtë të diel me një takim me komunitetin shqiptar në Michigan.
Në një postim në Facebook, Rama bëri të ditur se është ftuar nga shqiptarët që jetojnë atje, ndërsa ftoi edhe pjesëtarë të tjerë të komunitetit që t’i bashkohen aktivitetit.
“Këtë herë vizita e javës së Kombeve të Bashkuara në Amerikë, nis sot pasdite me shqiptarët dhe për shqiptarët, në Michigan, ku kam nderin të jem i ftuar nga komuniteti e ku ftoj këdo që dëshiron të vijë të na bashkohet”, shkroi Rama.
Në Miçigan Rama do të takohet me komunitetin shqiptar dhe përfaqësues të bizneseve të mëdha shqiptaro-amerikane që synojnë të investojnë në Shqipëri.
Ndalesën e parë e bëri në Universal Transport, një sipërmarrje e suksesshme e një shqiptaro-amerikani, që operon në transportin e pjesëve të industrisë automobilistike nga Miçigani drejt shteteve të tjera.
Gjatë vizitës, zoti Rama u njoh me qendrën e operimit pranë aeroportit të Detroitit, e cila është zgjeruar së fundmi me investime të reja.
Presidenti i Universal Transport, Adriatik Sheko, falënderoi Kryeministrin Rama për vizitën dhe vlerësoi hapjen e dyerve për diasporën që dëshiron të investojë në Shqipëri, sidomos në fushën e energjisë, turizmit dhe agroturizmit përmes Paketës së Maleve.
Kryeministri pati gjithashtu një bashkëbisedim me pjesëtarë të stafit dhe përfaqësues të komunitetit shqiptar në Miçigan të pranishëm në aktivitet. Më pas, ai pritet të zhvillojë në orën 18:00, sipas orës lokale, një takim të zgjeruar me komunitetin shqiptar.