Këshilli i Lartë i Prokurorisë (KLP) ka reaguar dy ditë pas atentatit ndaj prokurorit Arjan Ndoja.
Edhe pse nuk e përmend me emër, KLP, në reagimin e tij, shprehet se deklaratat e drejtuesve të lartë të qeverisë për hetimet dhe veprimet e Prokurorisë së Durrësit janë të tilla që mund të paragjykojnë ecurinë dhe përfundimin e një procesi gjyqësor në vijim dhe të procedurave të tjera ligjore.
Për këtë arsye, KLP u kërkon aktorëve politikë që të denoncojnë pranë Prokurorisë së Krimeve të Rënda të gjitha rastet e dyshuara të kryerjes së veprave penale nga çdo prokuror i Republikës.
Nga ana tjetër, KLP inkurajon çdo prokuror që të vijojë punën me përgjegjshmëri të lartë në zbatim të kompetencave kushtetuese për ushtrimin e ndjekjes penale dhe përfaqësimin e akuzës në shërbim të shoqërisë.
“Mënyra më e mirë për të arritur tek e vërteta është respektimi i procedurave dhe i institucioneve të ngarkuara nga ligji”, përfundon reagimi i Këshillit të Lartë të Prokurorisë.
