Qeveria ka depozituar sor në Parlament një akt normativ për vrasjen e 25-vjeçarit Klodjan Rasha më 8 dhjetor nga një efektiv policie.
Ky akt normativ është për t’i hapur rrugë kështu zbatimit të vendimit të qeverisë për dhënien e pensionit sociale për familjen Rasha. Për këtë qeveria kërkon miratimin me procedurë të shpejtuar ndryshimet ligjore në formën e një akti normativ.
“Vdekja aksidentale e të riut por edhe raste të tjera të ngjashme që mund të ndodhin gjatë ushtrimit të detyrës nga punonjës së organeve ligjzbatuese, përveç dhimbjes për humbjen e personit të familjes, krijojnë edhe vështirësi të natyrës ekonomike për familjen e tij. Duke marrë në konsideratë moshën aktive për punë, dhe po ashtu faktin se mund të jenë kontribuues në të ardhura në familje shikojmë të nevojshme dhënien e një ndihme financiare familjes përkatëse”, thuhet në relacionin e qeverisë, edhe pse nuk përmendet emri konkret i të ndjerit Rasha..
Më tej theksohet se humbja e jetës aksidentalisht, nga një veprim i punonjësit gjatë ushtrimit të detyrës, përveç të tjerave vë në vështirësi financiare familjen dhe e çon atë në varfëri sidomos në rastet kur pjesëtarët e familjes janë në moshë të thyer apo në moshë minorene.