Kuvendi ka kërkuar më tepër seriozitet nga prokuroritë në vend, sa i takon luftës ndaj korrupsionit dhe krimit të organizuar si dhe pastrimit të parave. Gazeta “SOT” ka siguruar projektrezolutën e hartuar nga Komisioni i Ligjeve për Prokurorinë e Përgjithshme, ku ka lënë një sërë detyrash për vitin 2020.
Kuvendi i ka parashtruar disa kërkesa Prokurorisë së Përgjithshme ku i kërkon kësaj të fundit të kryejë disa detyra, ku përmend, rritjen e efektivitetit, rritje të bashkëpunimit institucional, forcimi i bashkëpunimit me KLP etj. “Kuvendi i Shqipërisë kërkon nga prokuroria, rritjen e mëtejshme të efektivitetit në luftën kundër kriminalitetit dhe forcimin e koordinimit me Prokurorinë e Posaçme të Luftës kundër Krimit të Organizuar dhe Korrupsionit për rritjen e cilësisë së hetimeve dhe ndjekjes penale.
Të rrisë efektivitetin e bashkëpunimit ndërinstitucional me agjencitë e tjera për luftimin e pastrimit të produkteve dhe krimit financiar, të forcojë kapacitetet profesionale për hetimet pasurore, hetimet proaktive të pastrimit të parave, sekuestrimit dhe konfiskimit të tyre me qëllim zbulimin, identifikimin dhe sekuestrimin/konfiskimin e pasurive që rrjedhin nga veprimtaria kriminale si dhe për një politikë penale efektive në këtë fushë”, thuhet në projektrezolutë.
Më tej, në 13 pika që Kuvendi i ka parashtruar gjithsej si kërkesa Prokurorisë së Përgjithshme, theksohet edhe rritje e aksesit të përdorimit të të dhënave në databazat shtetërore. Po ashtu Kuvendi i kërkon prokurorisë që të miratojë rregullat standarde për organizimin e prokurorive me juridiksion të përgjithshëm.
“Të vijojë punën për rritjen e aksesit të përdorimit të të dhënave në databazat shtetërore, sidomos në atë të noterisë dhe të shërbimit të përmbarimit gjyqësor dhe të informojë Kuvendin në lidhje me përmbushjen e këtij rekomandimi dhe nevojat për adresimin e vështirësive të hasura, nëse do të ketë të tilla. Të miratojë rregullat standarde për organizimin dhe funksionimin e prokurorive me juridiksion të përgjithshëm me qëllim që të sigurojnë efikasitet në organizimin, drejtimin dhe kontrollin e punës në çdo prokurori është në proces”, thuhet në rezolutën që ka siguruar gazeta.
Kërkesat e Kuvendit
Në rezolutën e Kuvendit bëhet një pasqyrim i punës së Prokurorisë së Përgjithshme ku theksohet se, është rritur bashkëpunimi me partnerët ndërkombëtarë dhe autoritetet gjyqësore të huaja dhe Prokuroria e Përgjithshme po bashkëpunon me Këshillin e Lartë të Prokurorisë dhe Shkollën e Magjistraturës, por sakaq Kuvendi nuk është kursyer në kërkesat e kritikat ndaj këtij organi.
Përpos kërkesave që janë theksuar më sipër, Kuvendi kërkon dhe rritjen e bashkëpunimit mes institucioneve të drejtësisë, ku thekson Prokurorinë e Përgjithshme dhe KLP. “Të forcojë bashkëpunimin me Këshillin e Lartë të Prokurorisë dhe Shkollën e Magjistraturës për të plotësuar nevojat për prokurorë dhe sigurimin e mbarëvajtjes së punës në të gjitha prokuroritë e rretheve gjyqësore.
Të miratojë udhëzimin e standardizuar në lidhje me zbatimin e ligjit nr. 138/2015, “Për garantimin e integritetit të personave që zgjidhen, emërohen ose ushtrojnë funksione publike”. Të nxisë, bashkëpunojë dhe kontribuojë në miratimin sa më shpejt nga ana e Komisionit të Policisë Gjyqësore të sistemit të vlerësimit të oficerëve të Policisë Gjyqësore”, thuhet ndër të tjera në rezolutë./Sot/ARBJONA ÇIBUKU