Mbërritja e Saimir Tahirit në Parlament, do të ishte lajmi i ditës, por nuk ndodhi kështu. Për të shpëtuar mandatin, pothuaj pas 6 muajve mungesë, ish-ministri i Brendshëm e kishte regjistruar emrin për të folur në Kuvend rreth 20 minuta për një marrëveshje financimi mes Republikës së Shqipërisë, Italisë dhe Komisionit Evropian.
Por edhe pse gazetarët e prisnin në oborrin e Parlamentit, Saimir Tahiri nuk u duk për asnjë moment.
Që prej seancës së 25 tetorit të vitit të shkuar, deputeti i përjashtuar nga radhët e Partisë Socialiste nuk ka marrë pjesë në asnjë komision parlamentar dhe seance plenare.
Raportimet dhe imazhet që vinin nga salla e Parlamentit, mesa duket kanë bërë që Saimir Tahiri të ndryshonte mendje, dhe të mos shkonte në Kuvend, edhe pse afatet kohore nuk janë në anën e tij.
Ish-socialistit i kanë mbetur edhe dy seanca plenare për të marrë pjesë dhe për të përdorur kartën e tij të deputetit, në të kundërt më 26 prill ai rrezikon të humbasë mandatin bashkë me mbrojtjen që petku i deputeti i jep, për të mos u arrestuar.
Para 6 muajsh, mazhoranca refuzoi të autorizonte Prokurorinë për ta arrestuar deputetin e akuzuar për përfshirje në kultivimin dhe trafikimin e lëndëve narkotike, por tashmë Saimir Tahiri duhet të mbrojë veten dhe për këtë i duhet të paraqitet në Kuvend, aty ku opozita e pret me padurim.(BalkanWeb)
