Deklaratat se Rusia po tenton të zgjerojë ndikimin e saj negativ në Ballkan kanë irrituar Moskën. Thuajse të gjithë zyrtarët e SHBA-BE ndajnë të njëjtin mendim në këtë drejtim, duke e akuzuar shtetin rus se synon të zgjasë tentakulat në vendet e rajonit duke shfrytëzuar momentet e trazirave. Por një kundërpërgjigje ndaj këtyre deklaratave e ka dhënë ambasadori i Rusisë në Tiranë, Aleksandër Karpushin.
Gjatë një interviste mediatike, ai i akuzoi SHBA-BE se po trillojnë për Rusinë. Sipas tij, këto trillime vijnë për shkak të frikës nga konkurrenca e ndershme me shtetin rus. “Rusia ka qenë, është dhe do të jetë e pranishme në Ballkan, si një partner i ndershëm dhe pragmatik që realizon interesat e tij, në radhë të parë ekonomike, por pa i cenuar në asnjë mënyrë interesat e vendeve të rajonit, me të cilat do të vazhdojmë të zhvillojmë një bashkëpunim të ngushtë ekonomiko-tregtar dhe humanitar. Kjo quhet komunikim i qytetëruar.
Ndërsa trillimet e ndryshme për një ndikim negativ të Rusisë në Ballkan nuk kanë asnjë bazë racionale dhe janë rezultat vetëm i arrogancës dhe frikës nga konkurrenca e ndershme”, deklaroi Karpushin. Ata që e sulmojnë vazhdimisht Moskën, diplomati rus i quan si rusofobë të pashërueshëm. Aleksandër Karpushin shtoi se këto sulme dhe akuza vijnë për shkak se shumë vende nuk e pëlqejnë sjelljen e pavarur të Rusisë dhe prandaj lobojnë kundër Moskës në vendet e Ballkanit.
“Vlera kryesore e Rusisë është sovraniteti i saj dhe aftësia për të ndjekur një politikë të jashtme të pavarur. Ne i respektojmë interesat e qendrave të tjera të fuqisë dhe dëshirojmë të na respektojnë edhe ne në të njëjtën mënyrë. Vendi ynë nuk do të heqë dorë nga parimet e tij dhe do të vazhdojë të mbështesë pacenueshmërinë e së drejtës ndërkombëtare dhe rolit qendror të OKB-së në zgjidhjen e krizave në botë. Shumëkujt nuk i pëlqen sjellja e pavarur e Rusisë, madje ajo nuk i pëlqen në mënyrë kronike, të vazhdueshme, për dekada të tëra dhe madje për shekuj. Megjithatë, ky nuk është problemi i Rusisë, është problemi i rusofobëve të pashërueshëm”, tha Aleksandër Karpushin.
