Juventusi bëri një përmbysje të madhe në mbrëmje në duelin vendimtar me Interin, pikërisht në stadiumin “San Siro” të Milanos, duke fituar 3-2 një ndeshje që cilësohej vendimtare për fatet e titullit kampion në Itali. Dhe Juventusi jo vetëm fitoi, por ruan të paprekur kryesimin e Serisë A, duke bërë një hap të madh drejt titullit kampion. Për momentin katër pikë larg Napolit të vendit të dytë, por napolitanët do të luajnë të dielën ndeshjen e tyre përballë Fiorentinës dhe kanë sërish shans të afrohen me një pikë.
Sa i përket ndeshjes, Juventusi u shfaq më kërkues që në minutat e para, madje duke gjetur golin në minutëbn e 13-të, kur Daglas Kosta shfrytëzoi një rreshtim të gabuar të Kandrevës dhe ndëshkoi Handanoviç. Në minutën e 15-të gjërat për Interin u bënë shumë të vështira, pasi mesfushori uruguajan Vecino, në një top të diskutueshëm me Mandzukiç, shkel me takë kroatin dhe pas VAR-it, Orsato vendos t’i tregojë kartonin e kuq.
Nga ky moment loja tensionohet dhe arbitri detyrohet të ndëshkojë disa futbollistë të bardhezinjve, pasi vendosi që në fillim që të veprojë me dënim maksimal. Loja vijoi të jetë e tensionuar, teksa zikaltrit patën pretendimet e tyre edhe në 2-3 raste ndërhyrjesh të gabuara, por të gjykuara si të rregullta nga Orsato. Gjatë 6 minutave shtesë në pjesën e parë, Juventusi shënon edhe një tjetër gol, por që u anulua nga VAR, pasi ishte në pozicion të dukshëm jashtë loje. Nga ana tjetër, Interi rrezikoi në dy raste me Kandrevën, por Buffon ishte në lartësinë e duhur për të shmangur golin.
Por Interi nuk kishte ndërmend të dorëzohej dhe u vu i gjithi në funksion të përmbysjes së rezultatit dhe ia doli në pjesën e dytë por jo për krejt ndeshjen. Golin e barazimit e shënoi Mauro Ikardi në minutën e 52-të, ku argjentinasi devijon në rrjetë një top të krosuar në zonë nga portugezi Joao Kancelo. Në minutën e 58-të, “San Siro” ulëret sërish, këtë herë pasi Orsato vendos të falë Miralem Pjaniç, që kishte një karton të verdhë dhe nuk merr të dytin, ndonëse ndërhyrja ndaj Rafinjës ishte vërtet e ashpër.
Në minutën e 65-të tifozëria zikaltër do të kalonte sërish në delir, pasi Perisiç bën gjithçka mirë në krahun e majtë, futet në zonë dhe kërkon pasimin për Ikardin, por Barzagli ndërhyn më përpara dhe devijon topin në rrjetën e Bufon, duke bërë që Interi ta përmbysë rezultatin, këtë herë në favor 2-1. Duke parë situatën e krijuar, trajneri i Juventusit Masimiliano Alegri kryen të 3 zëvendësimet, duke hedhur në fushë Dybalën, Bernardeskin dhe Bentankur, ndërsa pikërisht argjentinasi i afrohet golit të barazimit me goditje dënimi, por Handanoviç bën mrekullinë, duke grushtuar.
Barazimi për skuadrën e Alegrit vjen në minutën e 87-të, kur Kuadrado bën gjithçka mirë në zonë dhe kthen një pasim drejt qendrës, që Skriniar e devijon në rrjetën e Handanoviç. Vetëm dy minuta më pas, është Higuain që shënon golin e avantazhit për bardhezinjtë, pasi sheh sërish Santon të gabojë dhe rikthen edhe njëherë Juventusin në avantazh.
Pas kësaj fitoreje Juventusi ngjitet në kuotën e 88 pikëve, ndërsa Interi komplikon maksimalisht arritjen në zonën Champions. Kjo humbje e lë atë në vend të pestë ndërsa Lacio rivale ka një shans të dielën të thellojë epërsinë e të ketë më shumë shanse për të siguruar zonën top-4 që të jep të drejtën e pjesëmarrjes në Ligën e Kampioneve.
