Ish-kryeministri Sali Berisha ka ngritur dje pretendime se nuk është kërkuar vetëm arrestimi i Ilir Metës nga ambasadorët, pasi ka pasur një kërkesë dhe për arrestimin e tij. Duke folur dje në studion e “ABC News”, ai tha se ka qenë ambasadorja Romana Vlahutin ajo e cila i ka kërkuar ish-kryeprokurorit Adriatik Llalla arrestimin e tij.
Madje sipas tij, Llalla ka informuar Bujar Nishanin, që ishte president në atë kohë. Por deklarata e Berishës tregon dhe një herë se ambasadorët e SHBA-BE kanë vënë në alarm politikën shqiptare. “Unë kam pasur rast analoge me Vlahutin. Sado që ajo e ka mohuar unë e besoj. Zoti Llalla i ka thënë Nishanit se zonja ambasadore ka kërkuar arrestimin e Sali Berishës. Unë këtë e kisha marrë vesh nga ambasadorë të huaj, por nuk i kisha dhënë rëndësi. Para se Adriatiku (Llalla) t’i thoshte Nishanit ishte një ambasador i rëndësishëm që ma ka rrëfyer. A e besoj unë këtë? 100%. Kur ke fiksime dhe komplekse nuk mund të ndalesh.
Ajo u tha para ca muajsh ambasadorëve: “Mos hajdeni me telefona sepse disa kate më poshtë është Sali Berisha dhe ju përgjon”. Ose është e sëmurë ose maniake dhe ajo duhet të ketë një “berishofobi” 10 herë më ta madhe se Rama. Ajo bën një provokacion të madh sa shumë kanë qeshur. Kjo është e aftë të bëjë çdo përpjekje. Unë nuk mund ta komentoj këtë në rastin e Lu sepse në rastin e tij nuk e jam i bindur”, tha ai dje.
Ish-kryeministri po ashtu shpërtheu sërish në akuza ndaj ambasadorëve. Ai deklaroi se qëllimi i Lu dhe Vlahutin ishte kapja e reformës në drejtësi nga Soros.
“Reforma në drejtësi është hedhur në erë. Ky përvetësim që i bëri Edi Rama drejtësisë, do t’i kushtojë atij edhe lëkurën e tij, sepse e mori drejtësinë mbi vete. Dy ambasadorët në zbatim të platformës së Sorosit bënë gjithçka t’i japin drejtësinë atij. Rama ka kapur tërësisht drejtësinë. Sot s’ka reformë, reforma është e hedhur në erë që në momentin e vendosjes së Ramës si kryeprokuror”, tha Berisha.
