Ndërkombëtarët kanë rritur presionin ndaj presidentit Ilir Meta sa i takon debatit për emërimin e Sandër Lleshit ministër të Brendshëm. Kreu i shtetit ka deri nesër afat të vendosë, por duket se kundër tij nuk është vetëm qeveria, por janë rreshtuar dhe SHBA e BE. Përveç ambasadorit Soreca dhe eurodeputeti Knut Fleckenstein, dje ka ardhur një thirrje e drejtpërdrejtë nga Brukseli për kreun e shtetit.
Ka qenë shefja për politikën e jashtme të BE, Federica Mogherini, ajo e cila ka bërë të ditur se nuk duhet të krijohet asnjë ngërç në punën e Ministrisë së Brendshme. Gjatë një konference të përbashkët për shtyp me ministrin e Jashtëm Ditmir Bushati pas takimit të 10-të të Këshillit të Stabilizim Asociimit mes Shqipërisë dhe BE-së, Mogherini deklaroi se Ministria e Brendshme duhet të ketë një drejtim të plotë.
“Unë mund të konfirmoj mesazhin tonë të bërë të ditur dhe në Tiranë. Është e rëndësishme për BE që të monitorojë punën e Ministrisë së Brendshme, e cila duhet të ecë në mënyrë funksionale dhe aktive. Ajo duhet të drejtohet në mënyrë të plotë dhe të pandërprerë”, tha ajo. Më tej shefja e zgjerimit në BE bëri të ditur se kjo çështje është diskutuar dhe në takimin me ministrin Bushati. Pra sinjalet janë se BE është e shqetësuar për ngërçin e krijuar dhe tani të gjithë janë rreshtuar kundër.
Përveç mediave dhe disa analistëve pranë presidentit, askush tjetër nuk e mbështet lëvizjen e tij. Por dje ka ardhur një mesazh i qartë nga Brukseli, me argumentin e ministria e Brendshme është vendimtare në luftën ndaj krimit e korrupsionit dhe këto janë kushte për hapjen e negociatave.
Bushati mesazh Metës
Një mesazh në distancë i ka dërguar dje presidentit edhe ministri i Jashtëm, Ditmir Bushati, shkruan ‘Sot’. Duke folur në konferencën e përbashkët me Mogherinin dhe komisionerin Johanes Hahn, Bushati tha se ka marrë porosi nga Brukseli se puna e Ministrisë së Brendshme nuk duhet të bllokohet. Por ai tha se thirrjet e ndërkombëtarëve duhet që të dëgjohen në Tiranë, duke ju adresuar në këtë mënyrë presidentit. “Përgjigjja nga ana e përfaqësues së BE ishte shteruese.
Të njëjtin mesazh ka marrë dhe gjatë punimeve të Këshillit të Stabilizim Asociimit. Në të njëjtën linjë çfarë ka deklaruar delegacioni i BE në Tiranë dhe ambasada e SHBA në Tiranë. Dua të besoj që mesazhi i qartë nga ana e Brukselit dhe Uashingtonit të dëgjohet qartë në Tiranë në mënyrë që nacionaliteti të triumfoj në vend. I jam falënderues Bashkimit Europian për të gjithë ndihmën që japin në luftën ndaj krimit dhe korrupsionit. Dihet që partnerit kryesor është policia dhe Ministria e Brendshme.
Nesër afti i fundit
Presidenti Ilir Meta ka afat deri nesër për të vendosur nëse do e dekretojë ose jo Sandër Lleshin ministër të Brendshëm. Kryeministri i dërgoi të premten e javës së parë për të dytën herë kërkesën e presidentit dhe afti skadon këtë të premte. Kushtetuta ka vendosur 7 ditë kohë. Një ditë më parë Rama u shpreh i bindur se presidenti do e firmosë dekretin. Sipas tij, debati për statusin e Sandër Lleshit nëse është ushtarak aktiv apo jo është mjaft i kotë, pasi edhe nëse është aktiv ai mund të ç’dekretohet. Mbetet të shihet se çfarë do të vendosë Meta.
