Edi Rama e uroi Giorgia Melonin për rekordin 1413 ditor si kryeministrja me qeverinë më jetëgjatë në historinë e Republikës Italiane, ndërsa përgjigjja e homologes italiane nuk vonoi.
Pasi kryeministri shqiptar i tha me humor se ishte “mësuar keq” duke ndërruar vazhdimisht bashkëbisedues në Romë dhe se tani Melonit i mbetej vetëm të thyente rekordin e tij në krye të qeverisë shqiptare, kryeministrja italiane iu përgjigj në të njëjtin ton.
“Miku im Edi, faleminderit nga zemra për këtë videomesazh. Si gjithmonë, di të ndërthurësh ironinë me disa të vërteta që nuk është gjithmonë e lehtë t’i dëgjosh!”, shkroi Meloni në rrjetin X, teksa ripostoi videon e Ramës.
Duke iu referuar batutës së kryeministrit shqiptar për ndryshimet e shpeshta të qeverive në Itali, Meloni shkroi se i vjen mirë që, “pas kaq shumë ndryshimesh të bashkëbiseduesve në Romë”, Rama më në fund pati mundësinë të lidhej me “atë aktualin”.
“Ndërrimi i shpeshtë i skuadrës nuk ndihmon kurrë për të ndërtuar diçka të qëndrueshme. Por, kur gjen ekipin e duhur, është më e lehtë të luash mirë dhe të arrish rezultate”, shtoi ajo.
Në videomesazhin e tij, Rama kishte thënë se Italia nuk u bë ajo që shumë kishin parashikuar kur Meloni mori pushtetin, duke shtuar se ajo “e përqafoi Evropën” dhe ndihmoi në debatet për sigurinë dhe emigracionin. Me të njëjtën frymë, Meloni vlerësoi marrëdhënien që kanë ndërtuar gjatë viteve.
“Në këto vite kemi ndarë një marrëdhënie të sinqertë dhe një bashkëpunim konkret, që ka forcuar gjithnjë e më shumë lidhjet mes kombeve tona. Shqipëria është një mike dhe partnere e çmuar dhe jam krenare për rrugën që po bëjmë së bashku, edhe në arenën evropiane”, shkroi kryeministrja italiane.
Meloni e mbylli mesazhin me një përshëndetje për Ramën: “Një përqafim të ngrohtë për Edi Ramën dhe shihemi së shpejti.”
Postimi i plotë i Melonit në X
Edi, miku im, faleminderit nga zemra për këtë videomesazh. Si gjithmonë, di të ndërthurësh ironinë me disa të vërteta që nuk është gjithmonë e lehtë t’i dëgjosh! Më vjen mirë të dëgjoj se, pas kaq shumë ndryshimesh të bashkëbiseduesve në Romë, më në fund ke pasur mundësinë të lidhesh pak më shumë me atë aktualin. Ndërrimi i shpeshtë i skuadrës nuk ndihmon kurrë për të ndërtuar diçka të qëndrueshme. Por, kur gjen ekipin e duhur, është më e lehtë të luash mirë dhe të arrish rezultate.
Gjatë këtyre viteve kemi ndërtuar një marrëdhënie të sinqertë dhe një bashkëpunim konkret, që i ka forcuar gjithnjë e më shumë lidhjet mes vendeve tona. Shqipëria është një mike dhe partnere e çmuar dhe jam krenare për rrugën që po ndjekim së bashku, edhe në arenën evropiane.
Një përqafim të ngrohtë për @ediramaal dhe shihemi së shpejti!
