Partia Demokratike në Korçë pothuajse është shuar plotësisht.
Pas dorëheqjes së kryetarit të PD-së në këtë qytet, Andrea Mano dhe anëtarëve të Kryesisë, sot ka ndodhur një tjetër dorëheqje massive.
Bëhet fjalë për 51 kryetarë dhe sekretarë të grupseksioneve.
Ata janë të pakënaqur më drejtimin e PD-së nga Lulzim Basha dhe në mungesë të reflektimit të tij, kanë vendosur të largohen nga partia.
“Ne si kryetarë, sekretarë dhe koordinatorë të Lidhjes Demokratike të Gruas solidarizohemi me dorëheqjen e anëtarëve të Kryesisë së PD Korçë dhe kemi vendosur të japim dorëheqjen nga funksionet drejtuese”, thonë ata.
Arsye kryesore për dorëheqjen e tyre konsiderojnë liderin e PD-së për të cilin thonë se me sjelljen e tij ka hedhur poshtë mundin dhe sakrificat e tyre.
“Gjykojmë që, lideri aktual i saj, po tenton me arrogancën e tij, ta kthejë PD në një parti klienteliste në funksion të interesave të tij personale.
Me veprimet e tij mendojmë se z. Basha ka hedhur poshtë të gjithë mundin dhe sakrificat tona në opozitën më të vështirë në historinë e PD.
Të ndodhur në këto kushte 51 drejtues seksionesh dhe Lidhjes Demokratike të Gruas e gjejmë të pamundur të ushtrojmë funksionet tona drejtuese. Nga ky moment, ne mbetemi vetëm anëtarë të PD Korçë”, thuhet në deklaratë.
