Polemika të forta kanë përfshirë Francën pas një artikulli të botuar nga revista e njohur Madame Figaro, ku vajza 13-vjeçare e ish-presidentit Nicolas Sarkozy dhe modeles Carla Bruni, Giulia Sarkozy, u përshkrua si “më femër se kurrë”.
Komentet e revistës, të nxitura nga videot që Giulia poston në platformën TikTok, u konsideruan të papërshtatshme dhe të papërgjegjshme nga shumë lexues dhe personalitete publike. Revista shkroi:
“Kemi zbuluar një adoleshente më femër se kurrë.”
Kjo frazë, së bashku me përshkrime të tjera, si veshja e saj apo dukja “model” që u tha se “reflekton trashëgiminë e nënës së saj si ikonë e viteve ’90”, shkaktoi reagime të ashpra. Kritikat e shumta vunë theksin te fakti se një 13-vjeçare nuk duhet të përshkruhet me terma që zakonisht lidhen me feminitetin e rritur.
Ish-ministrja franceze e Çështjeve Evropiane, Nathalie Loiseau, reagoi publikisht në platformën X (ish-Twitter), duke thënë:
“Madame Figaro po shkruan për një fëmijë 13-vjeçar. Karakterizime të tilla janë të papërshtatshme dhe madje të papërgjegjshme. Ju ftoj të mendoni para se të përdorni shprehje të tilla.”
Artikulli, ndonëse është hequr nga postimet e rrjetit social X pas valës së kritikave, ende nuk është tërhequr nga faqja zyrtare e revistës, dhe asnjë kërkesë faljeje nuk është bërë nga redaksia.
Kjo ngjarje ka ngritur sërish debatet mbi kufijtë etikë të medias dhe mbrojtjen e privatësisë e dinjitetit të të miturve në publik.
