Nga Rigels Seliman
Historia ka treguar se në Shqipëri politikanët bëhen trima dhe ngrejnë krye vetëm kur u preket intersi personal apo kur nuk gëzojnë më ofiqe. I tillë është dhe rasti ish-ministrit të Jashtëm, Ditmir Bushati, i cili ditët e fundit është vënë në qendër të vemëndjes për shkak se ka shfaqur rezerva sa i takon qasjes politike që Partia Socialiste ku ai bën pjesë ka me qytetarët.
Bushati ditët e fundit po tenton të bëhet protagonist, duke lëshuar kritika në adresë të mazhorancës qeverisëse se me demek i dhimbsen qytetarët, ndërsa harron faktin që ka qenë prej 6 vitesh ministër në qeverinë Rama dhe nuk tha asgjë për popullin. Por tani qysh prej një viti që ka zbritur nga kali i pushtetit, ish-ministri ka ngritur zërin duke i kërkuar llogari qeverisë që ka braktisur qytetarët. Mirëpo, kjo qasje e Bushatit se i dhimbset populli është një gënjeshtër e madhe që dhe vetë ai nuk beson.
Ish-minstri mund të jetë i formuar, i arsimuar dhe socialist, por lëvizjet e tij të fundit i kanë veshur atij kostumin e hipokritit. Pse thotë dikush nga ju? Ndërkohë që dikush tjetër thotë se ç’farë të keqe ka dhe se kritikat, madje mendimi ndryshe e forcojnë demokracinë në një parti?! Po, shumë dakord jam me ju! Por ka një problem se kritikat dhe rezervat që ke ndaj një qeverie nuk mund t’i bësh vetëm kur ke hequr dorë nga çorba e pushtetit, sepse një politikan race është i “dënuar” që të kritojë edhe kur vetë është pjesë e vendimmarrjes apo qeverisë.
Megjithatë, për 6 vite ne nuk e pamë Bushatin që të bënte opozitën e mazhorancës, pasi i pëlqente më shumë të ngjyente një çap bukë në supën e qeverisë dhe se kujtohej që kishte popull vetëm kur vinin votimet! Po, po mos u çudisni po kjo është e vërteta. Ish-ministri Bushati për 6 vite kishte statusin e politikanit apo ministër memec, ndërkohë që tani është kthyer në politikan “kritik” hipokrit.
E kam etiketuar si politikan hipokrit, për vetë faktin se ai mund ta kritikonte qeverinë kur shikonte që nuk po bëhej një gjë mirë apo po i bëhej ndonjë padrejtësi popullit. Por për hir të së vërtetës nuk pamë e dëgjuam as edhe një kritikë të artikuluar nga Bushati në adresë të qeverisë në 6 vite. Dhe nuk janë pak, por 6 vite.
Ndërkohë tani Bushati ka nxjerrë në pah se ka ngrint dhe se ai e do popullin, ku përmes kritikave ndaj mazhorancës përpiqet të bëj protagonistin. Mirëpo, Bushati nuk e kupton që është shndërruar në hipokrit, njësoj si ajo historia e djalit që vrau prindërit e tij dhe që trajtohet aq bukur nga Platoni në një nga kryeveprat e tij: “Pasi vrau prindërit, djali vrasës doli para togave të zeza. Gjykatësi i tha djalit: “Ke ndonjë gjë për të thënë?”. Po iu përgjigj vrasësi i prindërve: “Mëshirë, jam jetim”.
Kështu edhe puna e hipokritit Ditmir Bushatit, i cili shfaq e artikulon kritika, nga që i janë prekur interesat dhe nga që nuk është më pjesë e qeverisë. Politikani që është politikan dhe që pretendon së është shërbëtor e i shërben popullit, duhet të ngrejë zërin edhe kur është pjesë e vendimmarrjes apo qeverisë, jo vetëm kur është jashtë saj.
Sidoqoftë, mos u mërzisni se si Ditmir Bushati ka edhe plotë të tjerë që kritikojnë qeverinë dhe i bëjnë opozitë mazhorancës, ku bëjnë pjesë. I tillë është rasti i socialistes Irena Beqirajt, e cila lëshon herë pas here “diharre” kritikash, pak pasi u shkarkua apo largua nga zv/ministre e Financave. Kur ishte pjesë e Kabinetit Qeveritar edhe ajo gëzonte statusin e memeces si Ditmir Bushati.
Madje, thonë që zonja Beqiraj dozën e kritikave e ka shumë të fortë, pasi ka marrë leksione nga ish-deputetja e PS, Arta Dade, duke qënë se me këtë të fundit është parë shpesh në kafe para se Shqipëria të futej në karantinë për shkak të Covid-19. Dhe lista vijon me ish-minstrin e Brendshëm, Fatmir Xhafaj dhe ish-ministrin e Shëndetësisë, Ilir Beqaj, të cilët janë shndërruar në kritikë të mazhorancës qeverisëse, pasi u larguan apo shkarkuan nga këto poste.
Megjithatë, mos u çudisni që në zgjedhjet parlamentare të 2021 Fatmir Xhafën,Ilir Beqajn dhe Ditmir Bushatin të mos i shohim kandidatë për deputet nën siglën e PS, pasi ata janë politikanë hipokritë. Kështu që, duke e mbyllur dua të theksoj se Shqipëria nuk ka nevojë për politikanë “kritikë” hipokritë si Ditmir Bushati dhe derivat të tij. Thënë ndryshe dhe troç, t’i japim Bushatit, Xhafajt e Beqajt atë që meritojnë.