Avokati Gentian Rumano dhe gazetari Reldar Deda janë përplasur në një emision ku po diskutohej për dhunimin e avokatit të ish-kryeministrit Sali Berisha, Sokol Mëngjesit, gjatë paradites së sotme.
Gazetari Deda tha se avokatët janë kthyer në sekserë dhe hyjnë në marrëdhënie biznesi me klientët e tyre dhe prandaj sipas tij sulmohen.
Nga ana tjetër Rumano tha se avokatët janë njerëz të ndershëm që ofrojnë shërbim për klientët e tyre dhe paralajmëroi Dedën që të mos i quante avokatët sekserë, në të kundërt ai do i quante gazetarët gjobaxhinj.
Pjesë nga diskutimi në studio:
Deda: Avokatët ndonjëherë futen në disa marrëdhënie duke shfrytëzuar njerëzit, duke shfrytëzuar pamundësinë, duke shfrytëzuar këtë sistem, sistemin e vjetër të drejtësisë ku avokati në vend të jetë rregullator i ligjit, futet në pozicionin e sekserit. Kjo është një pamje që tragjeditë prodhohen për shkak se raporti me klientin tënd ka qenë përfitues, jo korrekt. Unë e shoh te studiet ligjore që avokatët nuk luajnë rolin e tyre që të shkojë haku te i zoti, por futen në marrëdhënie biznesi.
Rumano: Ky është shërbim o zotëri. Nga i nxjerr ti këto. Avokati nuk të detyron o zotëri. Avokati harxhon kohën për ty, harxhon jetën e vetë për të qëndruar pas klientit të vetë. Ku e gjete ti avokatin sekser mo. Nuk mund t’i etiketosh ti avokatët si sekser o zotëri. Nëse ti i etiketon avokatët si sekserë, unë mund të them që gazetarët janë gjobaxhinj. Por nuk e them kurrë sepse gazetarët janë të nderuar. Avokatët bëjnë shërbimin. Nuk mund t’i fyesh dot avokatët ti.
Deda: Ka edhe gazetarë gjobaxhinj. Por ka edhe të ndershëm, edhe kanë kurajon e ta thonë të vërtetën në sy. Jam 10 herë më aktor se ty. Më tregon mua t’i çfarë janë avokatët. Jeni sekserë të sistemit të drejtësië. Unë të them edhe emrin e avokatit që e ka bërë këtë gjë, emrin e studios ligjore.
