SPAK në bashkëpunim me Policinë e Shtetit po zhvillon një operacion për goditjen e një grupi kriminal të dyshuar për trafik të lëndëve narkotike e pastrim të parave në shuma të mëdha, në kuadër të grupit të strukturuar kriminal.
Mediat raportojne se janë lëshuar 20 masa sigurie ndërsa deri më tani në pranga ka rënë Orest Sota, ndërsa masë sigurie ‘arrest me burg’ është lëshuar dhe për biznesmenët Artur Shehu e Ilir Shtufi (i lidhur me Shkëlzen Berishën), të cilët ndodhen jashtë vendit, të dyshuar se kanë pastruar paratë e një grupi trafikantësh droge.
Burime nga SPAK bëjnë me dije se biznesmeni Ilir Shtufi është arrestuar pak më parë në Greqi.
Shtufi është një nga personat e përfshirë në dosjen e operacionit të zhvilluar sot nga SPAK kundër një grupi të strukturuar kriminal të dyshuar për trafik ndërkombëtar droge dhe pastrim parash.
Artur Shehu është një nga pronarët e tokës në Zvërnec, ku është planifikuar ndërtimi i një resorti luksoz.
