Sistemi i drejtësisë në vend duket se po ecën në rrugën e duhur. Nga procesi i vetingut, u shkarkuan shumë gjyqtarë dhe prokurorë, të cilët nuk justifikonin dot pasurinë e tyre që kishin vënë gjatë ushtrimit të detyrës. Por për avokat Spartak Ngjelën, të gjithë ata që kanë ngelur në veting kanë vendosur pasuri marramendëse përmes krimit të organizuar dhe korrupsionit.
Gjatë një reagimi për gazetën “SOT”, Ngjela u shpreh se hetimi i tyre nga ana e prokurorisë është i drejtë, duke theksuar se largimi i gjyqtarëve dhe prokurorëve të korruptuar nga sistemi i drejtësisë është një arritje e madhe për të ardhmen e vendit tonë. Por në analizën e tij, avokati tha se gjatë gjithë këtyre viteve Shqipëria është drejtuar nga bashkëpunimi mes gjykatave, prokurorive, politikës dhe krimit të organizuar, por sipas Ngjelës organet e reja të drejtësisë do t’i sfumojnë. Ndërkohë që duke iu referuar ngritjes së Byrosë Kombëtare të Hetimit, Ngjela tha se shumë shpejt ajo do të jetë gati, madje do të mbështetet edhe nga ndërkombëtarët.
“Gjyqtarët dhe prokurorët e ngelur në veting janë hequr për korrupsion dhe hetimi nga ana e prokurorisë për ta është e drejtë. Ata kishin me miliona euro dhe thoshin që na i ka dhënë gjyshja. Të ngelurit në veting është një arritje historike për vendin në funksion të reformës në drejtësi. Gjykatat dhe prokuroritë kanë sjellë krimin e organizuar në Shqipëri dhe kanë toleruar korrupsionin. Gjykata, prokuroria, politika dhe krimi i organizuar kanë qenë bashkë. Reforma në drejtësi do t’i sfumojë. SPAK është ngritur, ndërsa BKH po ngrihet me ekspertë të huaj, por pandemia i ndaloi, por ato do ngrihen se e tha dhe ambasadorja amerikane”, u shpreh Ngjela për gazetën.
Përballja me drejtësinë
Më tej avokati Spartak Ngjela u shpreh se pas gjyqtarëve dhe prokurorëve të ngelur në veting, shumë shpejt do të hetohen nga SPAK dhe Byroja e Hetimit të gjithë politikanët dhe funksionarët e lartë të shtetit që janë të përfshirë në afera korruptive dhe krim të organizuar. Sipas tij, organet e reja të drejtësisë, janë ngritur pikërisht për të luftuar krimin e organizuar dhe korrupsionin në nivele të larta. “Politikanët do të hetohen nga Prokuroria e Posaçme dhe Byroja e Hetimit dhe shkojnë në Gjykatën e Posaçme për pronat. SPAK ndaj është ngritur, që të marrë nën hetim korrupsionin e lartë politik dhe krimin e organizuar”, tha Ngjela.
Mbështetja e BE-SHBA
Më tej avokati përmes një postimi në rrjetin social Facebook u shpreh se asnjë nga politikanët e korruptuar nuk do arrijë dot të shpëtojë paratë që ka vjedhur, duke shtuar se ambasadorët e akredituar në vendin tonë të SHBA-BE duhet t’i ushtrojnë presion qeverisë për të goditur krimin e organizuar dhe korrupsionin. “Mbaheni mend: asnjë i korruptuar nuk do t’i shpëtojë dot paratë e vjedhura. Ambasadori i Bashkimit Europian në Tiranë, Luigi Soreca, prandaj doli sot, sepse e di që korrupsioni i lartë politik kërkon epidemi të gjerë në Shqipëri.
Por ambasadori Soreca duhet t’i bëjë presion kryeministrit shqiptar që ky të jetë i rreptë në goditjen e tubimeve që bien ndesh me ligjin, sepse ato janë të qëllimshme për të riaktivizuar pandeminë. Edhe ambasadorja e Shteteve të Bashkuara në Tiranë, Yuri Kim, duhet t’i bëjë presion publik kryeministrit shqiptar që ky të veprojë në mënyrë drastike kundër hajdutëve të korrupsionit shqiptar që, me tubime të paligjshme, po kërkojnë të rigjallërojnë epideminë në shkallë të gjerë në Shqipëri. Banditët kudo dhe kurdoherë kanë qenë antinjerëzorë”, tha Ngjela.