Mosplotësimi i kërkesave të parashtruara një vit më parë, i ka rikthyer studentët në protestë. Ashtu edhe siç kishin paralajmëruar, studentë të fakulteteve të ndryshme në vend bojkotuan ditën e djeshme mësimin, për të marshuar drejt Universitetit Politeknik, për kërkuar për rreth 2 orë rrëzimin e ligjit të arsimit të lartë.
Për të arritur këtë, nisën të mblidhnin dhe firmat e para të peticionit, që do të shpërndahet në të gjitha universitetet. Me thirrje kundër qeverisë, ata akuzojnë këtë të fundit se i mashtroi me paktin për universitetin, ku parashtroheshin kërkesat e tyre. Njëzëri, studentët shprehen se situata në universitete nuk ka ndryshuar, njësoj si dhe jeta e tyre studentore.
Ata paralajmëruan se do të vijojnë bojkotin e mësimit dhe do të rikthehen sërish në protestë, pasi të mbledhin 20 000 firmat e nevojshme për të rrëzuar ligjin e arsimit të lartë. Një prej studenteve e cila ditën e djeshme doli në protestë deklaroi se kërkesat e tyre janë ato që kanë qenë edhe një vit më parë. Ajo deklaron më tej se nuk do të dorëzohet deri në zgjidhjen e problemeve.
“Asnjë pika e paktit nuk u përmbajt. Ne kemi ardhur për të drejtat tona, tarifat u shtuan, në konvikt asgjë nuk ka në rregull. Shpresojmë të na mbështetin të gjithë. Disa nga problemet janë tarifat e larta, bursat, që tani duhet të kesh dy prindër invalidë që të marrësh bursë. Nuk e dimë çfarë do bëhet me ne, do jemi në protestë derisa të marrin zgjidhje problemet tona. Kam ardhur këtu dhe nuk do të dorëzohem. Pedagogët na kanë mbështetur, ndërsa studentët i ndalon frika”, u shpreh studentja në protestë.
Një tjetër student u shpreh se ata nuk kanë nevojë për kartën e studentit, ku të mundësohen ulje për në dyqane luksi. “Fakulteti i Filologjikut ka bojkotuar mësimin. Janë vetëm disa studentë që po bëjnë mësim dhe po presim të na bashkohen studentët e juridikut dhe pedagogët. Ne nuk kemi nevojë për ulje tek dyqani i Noizyt. Ne nuk kimi nevojë për pushime në Dubai. Karta e studentit janë vetëm për luksin, studentët si unë nuk kanë nevojë për këto, as për argjendari. Ne kemi nevojë për mensa sociale”, u shpreh studenti.
