Fitorja bindëse e demokratëve në zgjedhjet e mesmandatit solli edhe surpriza. Për herë të parë, në Senatin amerikan u zgjodh një mysliman, i cili pas sulmeve të republikanëve iu drejtua me ironi zv.presidentit Vance: “Habibi”. Fitore korri edhe burri i parë i deklaruar gay që zgjidhet senator, i cili festoi përkrah bashkëshortit të tij.
“Miçigan, ia dolëm!” Me këto fjalë e nisi festimin Abdul El-Sayed, 42 vjeç, mjeku që bëhet myslimani i parë i zgjedhur në Senatin amerikan. Demokrati mundi republikanin Mike Rogers, pas një fushate ku besimi i tij fetar u bë objekt sulmesh.
Trump dhe aleatët e tij e lidhën me ekstremizmin dhe Vëllazërinë Myslimane, akuza që El-Sayed i mohoi. Kundërshtimi i tij ndaj ndihmës ushtarake amerikane për Izraelin ishte gjithashtu në qendër të përplasjes politike.
Pas fitores, përgjigjja e tij shkoi drejtpërdrejt te Vance.
“JD, habibi, çfarë ironie e këndshme që je i detyruar nga Kushtetuta të më betosh në janar”, tha ai.
Ai gjithashtu i drejtoi një mesazh të ashpër Trumpit.
“E di që e ke të vështirë ta shqiptosh emrin tim, ndaj, pasi JD të më betojë, mund të më thërrasësh thjesht senator”, tha El-Sayed.
Një tjetër moment që tërhoqi vëmendjen erdhi nga Nju-Hempshëri. Chris Pappas, që mundi republikanin John E. Sununu, bëhet burri i parë i deklaruar gay i zgjedhur në Senat. Në skenën e fitores, demokrati falënderoi bashkëshortin, Vann Bentley.
“Jam njeriu më me fat, sepse jam i martuar me burrin që dua. Dhe pavarësisht të gjitha sulmeve dhe gënjeshtrave, është mirë të dish se dashuria dhe e vërteta mbizotëruan sonte”, tha ai, duke përqafuar bashkëshortin.
Në Kansas, surprizën e solli një pastor. Adam Hamilton mundi senatorin republikan Roger Marshall, megjithëse Trump dhe Vance shkuan në shtet për të mbështetur rivalin e tij. Hamilton bëhet demokrati i parë i zgjedhur senator nga Kansasi në 94 vjet.
Ai dhe James Talarico, fituesi demokrat i garës për Senat në Teksas, e vendosën besimin e krishterë në qendër të mesazhit të tyre për solidaritet dhe kujdes ndaj të varfërve.
Në Xhorxhia, ish-kryebashkiakja e Atlantës, Keisha Lance Bottoms, mundi miliarderin republikan Rick Jackson dhe bëhet gruaja e parë me ngjyrë e zgjedhur guvernatore në historinë amerikane.
Në Nju-Meksiko, Deb Haaland, pjesëtare e komunitetit Laguna Pueblo dhe ish-sekretare e Brendshme e administratës Biden, bëhet gruaja e parë nga komunitetet e amerikanëve vendas.
“Dua që çdo fëmijë që na sheh ta dijë se ëndrrat e tij kanë rëndësi”, tha ajo pas fitores.
Nga komunitetet e amerikanëve vendas vjen edhe Peggy Flanagan, e cila fitoi në Minesota dhe bëhet gruaja e parë e këtij komuniteti e zgjedhur në Senatin amerikan. Ndërsa në Teksas, Gina Hinojosa rrëzoi republikanin Greg Abbott dhe do të jetë guvernatorja e parë latine e shtetit.
Në Ohio, Amy Acton mundi republikanin Vivek Ramaswamy dhe bëhet gruaja e parë e zgjedhur guvernatore e shtetit. Ramaswamy u kritikua për një spot elektoral ku nëna e Acton e quante të bijën gënjeshtare. Ato nuk kanë më marrëdhënie që kur nënës iu hoq kujdestaria, pasi bashkëshorti i saj kishte përdhunuar Acton kur ishte 12 vjeçe. Guvernatorja nuk është vetëm gruaja e parë që mban një detyrë, por edhe demokratja e parë në 20 vjet.
“Shërimi nis sot”, tha ajo pas fitores.
Në Nju-Jork, Aber Kawas bëhet gruaja e parë amerikano-palestineze e zgjedhur në Senatin e shtetit. Socialistja demokrate bëri fushatë për banesa të përballueshme, mbrojtjen e emigrantëve dhe kundër financimeve amerikane për Izraelin.
“Bëmë historinë”, shkroi ajo.
Në Kaliforni, Xavier Becerra mundi ish-prezantuesin e Fox News, Steve Hilton. Ish-sekretari i Shëndetësisë i administratës Biden bëhet guvernatori i parë me origjinë hispanike që nga viti 1875, megjithëse në fillim të garës vetë drejtuesi i partisë së tij i kishte kërkuar të tërhiqej.
Në Nevada, Aaron Ford rrëzoi republikanin Joe Lombardo dhe bëhet guvernatori i parë afroamerikan i shtetit. Ndërsa në Karolinën e Jugut, pediatrja Annie Andrews bëhet gruaja e parë e zgjedhur në Senatin amerikan nga ky shtet.
Një tjetër emër mund të hyjë në histori në janar. Hakeem Jeffries është favoriti për t’u bërë kryetari i parë afroamerikan i Dhomës së Përfaqësuesve. Vendimi do të merret me votë kur të mblidhet Kongresi i ri.
