Tirana International Airport (TIA) dhe Policia e Shtetit kanë nënshkruar ditën e sotme marrëveshjen e bashkëpunimit për rritjen e sigurisë në aeroportin “Nënë Tereza”.
Ardi Veliu, Drejtori i Përgjithshëm i Policisë së Shtetit, tha se policia ka kërkuar shtimin e ambjenteve të policisë në aeroport, rritje të nivelit të sigurisë në rrethimin e aeroportit dhe se gjithashtu duhet rritur niveli i cilësisë së kamerave të sigurisë, të cilat sigurisht do të monitorohen nga Policia e Shtetit.
<em>“Marrëveshja konstiton në rritjen e parametrave të sigurisë dhe detyrimet që duhet të ketë TIA, përsa i përket detyrimeve që duhet të ketë ky institucion në lidhje me vendosjen e kamerave të sigurisë të një cilësie shumë të lartë të një shërbimi 24 orë ku të monitorohet edhe nga Policia e Shtetit. Njëkohësisht edhe për kushtet e tjera të sigurisë përsa i përket rrethimit, mënyrës së protokollit të hyrje-daljeve, personeli i cili duhet të futet. Pra, janë një sërë normash të cilat janë përcaktuar në këtë marrëveshje që do të ndikojnë sigurisht në rritjen e parametrave të sigurisë, njëkohësisht edhe në forcimin e bashkëpunimit ndërmjet Policisë së Shtetit dhe TIA-s. Punonjësi i Policisë, mbi bazën e marrëveshjes është vendosur edhe për monitorimin e kamerave në sallën e cila është aktualisht funksionale, por në marrëveshjen e re është përcaktuar që do të jetë një sallë edhe më e madhe me sistemet e fundit, ku padyshim që Policia e Shtetit do të jetë present në monitorim. Njëkohësisht, në marrëveshje është përcaktuar edhe rikonstruksioni dhe shtimi i ambienteve të policisë. Në ligj përgjegjësia është TIA-s, ne jemi partner”,</em> tha Ardi Veliu.