NGA RIGELS SELIMAN
Prokuroria e Posaçme Antikorrupsion ka rrëzuar padinë e juristit Romeo Kara për skandalin e CEZ. Pasi gjyqtari i Gjykatës së Tiranës, Lazër Sallaku, vendosi pak ditë më parë pushimin e hetimeve për dosjen “CEZ” në Gjykatën e Tiranës, e cila cilësohet si vjedhja më e madhe e 30 viteve demokraci, në 20 shkurt të këtij viti, juristit dhe ekspertit ligjor i OSHEE, Romeo Kara kallëzoi në SPAK për shpërdorim detyre gjyqtarin në fjalë.
Në të njëjtën kohë, në kallëzim kërkohej nga SPAK-u edhe sekuestrimi i gjithë dosjes CEZ, me dëm ekonomik mbi 400 milionë euro, ku të kallëzuar janë ish-kryeministri Sali Berisha, djali tij dhe ish-ministri Genc Ruli dhe disa ish-zyrtarë të tjerë. Por, Prokuroria e Posaçme ka rrëzuar padinë e juristit Kara kundër ish-kryeministrit Berisha dhe gjyqtarit Sallaku për aferën e CEZ.
Pra, teksa të gjithë prisnin drejtësi për këtë çështje, SPAK ka amnistuar sërish zotin Berisha dhe politikanët e tjerë, duke u fokusuar vetëm tek veprimet e gjyqtarit Lazër Sallaku. Meqenëse gjyqtari punon në Tiranë, Prokuroria e Posaçme Antikorrupsion ka vendosur dërgimin e dosjes kundër tij në Durrës për verifikim. Sipas SPAK-ut, vepra për të cilën akuzohet gjyqtari, sikundër është shpërdorimi i detyrës, është në kompetencë të një prokurorie të zakonshme.
Reagon juristi Kara
Por beteja për hapjen e dosjes “CEZ” vazhdon. Të paktën kështu mendon juristi Romeo Kara, i cili përmes një statusi të shpërndarë në rrjetet sociale konfirmoi se ka vënë në lëvizje Gjykatën Kundër Korrupsionit dhe Krimit të Organizuar, e njohur edhe si Gjykata Speciale, për të rrëzuar vendimin e SPAK. Juristi Kara i kërkon Gjykatës Speciale të detyrojë SPAK-un të shqyrtojë dosjen.
“Ky lloj SPAK-u së shpejti do të bëhet për t’u çuar në SPAK. Demagogjia me SPAK-un do të marrë fund shpejt, sepse ardhjen e drejtësisë nuk mund ta pengojë kjo strukturë e vjetër me emër të ri. Përpjekjet e mia vazhdojnë, pavarësisht spakizmit dhe politikës së pazareve pas tij”, deklaroi ai. Nga ana tjetër, juristi Romeo Kara shprehet se SPAK-u duhet të bëjë një hetim të plotë dhe të hollësishëm, jo vetëm për rolin e gjyqtarit Lazër Sallaku, por edhe për faktin se ka prova të arsyeshme për të çuar para drejtësisë ish-kryeministrin Berisha dhe personat e tjerë të përfshirë në këtë aferë.
“Dihet publikisht që unë kam bërë një kallëzim penal, drejtuar SPAK-ut, përkundrejt gjyqtarit, që pushoi në kundërshtim me ligjin, pa fakte e prova, pa realizuar qoftë edhe një hetim minimal, çështjen e privatizimit të OSSH-së. Realisht unë konstatova qartë shpërdorimin e detyrës nga ky gjyqtar, përveç atyre që thashë më lart. Kallëzimi ishte më shumë se i plotë, i hartuar në mënyrë shteruese dhe sigurisht i shoqëruar me disa qindra faqe prova e fakte. Brenda tre ditësh, duke lexuar vetëm pjesën e kallëzimit dhe pa i hapur fare provat, se për shqyrtim nuk bëhet fjalë, SPAK-u konstatoi moskompetencën e tij dhe më dërgoi njoftimin përkatës, që dosjen do t’ia dërgojë një tjetër gjykate. SPAK-u, që paguhet jo pak nga taksat tona, nuk do që ta kuptojë se, nuk është detyra ime si kallëzues, që të bëjë cilësimin juridik të veprës penale, por është pikërisht detyra e tij, që duke bërë një investigim sa më të plotë, të bëjë edhe cilësimin e saktë të veprës penale”, nënvizoi juristi Romeo Kara.
