Turqia ka marrë masa të jashtëzakonshme sigurie për samitin e NATO-s që do të zhvillohet më 7 dhe 8 korrik në Ankara, ku pritet të mblidhen liderët e të 32 vendeve anëtare të aleancës. Mes pjesëmarrësve pritet të jetë edhe presidenti amerikan Donald Trump, ndërsa autoritetet turke synojnë jo vetëm të garantojnë sigurinë e samitit, por edhe të tregojnë rolin dhe angazhimin e Turqisë brenda NATO-s.
Në kryeqytetin turk janë angazhuar dhjetëra mijëra efektivë policie, ndërsa sistemet e mbrojtjes ajrore janë vendosur në gatishmëri të lartë. Zona përreth aeroporteve, kompleksit presidencial ku do të mbahet samiti dhe hoteleve ku do të qëndrojnë delegacionet do të kenë kufizime të rrepta të qarkullimit.
Autoritetet kanë ndaluar protestat, koncertet dhe ceremonitë e diplomimit gjatë ditëve të samitit. Gjithashtu, punonjësit jo thelbësorë të administratës shtetërore janë nxjerrë me leje, me synimin për të ulur trafikun në qytetin me afro 6 milionë banorë.
LEXO EDHE:
Presidenti amerikan bën udhëtimin e parë me ‘Air Force One’ e ri që mori dhuratë nga Katari: Nuk ka asgjë tjetër si ky!
Për pritjen e delegacioneve ndërkombëtare, Turqia ka inauguruar edhe një aeroport të ri VIP, i ndërtuar mbi një ish-aeroport ushtarak. Sipas autoriteteve, ai do të përdoret për samitin dhe më pas do të mbetet në funksion vetëm për fluturime zyrtare. Mediat turke raportojnë gjithashtu se fasadat e ndërtesave përgjatë rrugës që lidh aeroportin me qendrën e Ankarasë janë lyer si pjesë e përgatitjeve për samitin.
Në javët para samitit, forcat e sigurisë kanë arrestuar më shumë se 200 persona të dyshuar për lidhje me grupe ekstremiste, përfshirë Shtetin Islamik. Sipas raportimeve, në mesin e të ndaluarve ka pasur edhe aktivistë, avokatë dhe një pedagog universitar.
Një gjykatë turke ka bllokuar gjithashtu aksesin në disa faqe interneti që publikonin materiale kritike ndaj NATO-s dhe samitit, duke argumentuar se masa ishte marrë për arsye sigurie dhe rendi publik. Ndërkohë, disa gazetarëve të mediave opozitare u është refuzuar akreditimi për të ndjekur aktivitetin, gjë që ka shkaktuar reagime nga organizatat për lirinë e medias.
Në samit pritet të diskutohen disa nga çështjet më të rëndësishme për të ardhmen e aleancës, përfshirë rritjen e shpenzimeve për mbrojtjen dhe rolin e Shteteve të Bashkuara në NATO. Takimi zhvillohet në një kohë kur deklaratat e Donald Trump për uljen e angazhimit amerikan në aleancë kanë krijuar pasiguri mes vendeve anëtare.
Ish-ambasadori turk në NATO, Fatih Ceylan, u shpreh se rëndësia kryesore e samitit do të jetë nëse SHBA-ja dhe vendet evropiane do të arrijnë të afrojnë qëndrimet e tyre.
“Nuk duhet të presim mrekulli, por nëse arrihet një qëndrim i përbashkët që thekson rëndësinë e NATO-s, kjo do të konsiderohej një sukses”, tha ai.
Vetë Trump ka lënë të kuptohet se organizimi i samitit në Turqi ka ndikuar në vendimin e tij për të marrë pjesë. “Po të mos mbahej në Turqi nga Presidenti Erdogan, nuk besoj se do të kisha shkuar”, u tha ai gazetarëve pas një takimi me Sekretarin e Përgjithshëm të NATO-s, Mark Rutte.
Presidenti turk Rexhep Tajip Erdogan e ka cilësuar Turqinë një aleate të besueshme që mban përgjegjësi të rëndësishme në krahun juglindor të NATO-s. Sipas tij, samiti i Ankarasë do të jetë një pikë referimi në historinë e aleancës.
Turqia është anëtare e NATO-s që prej vitit 1952 dhe ka ushtrinë e dytë më të madhe të aleancës pas SHBA-së. Megjithatë, vitet e fundit ajo ka ndjekur shpesh një politikë të pavarur, duke refuzuar t’u bashkohet sanksioneve ndaj Rusisë, duke blerë sisteme ruse të mbrojtjes ajrore dhe duke vonuar anëtarësimin e Finlandës dhe Suedisë në NATO derisa u plotësuan disa nga kërkesat e saj.
Sipas analistëve, pikërisht kjo politikë i ka dhënë Ankarasë mundësinë të luajë edhe rolin e ndërmjetëses në disa konflikte ndërkombëtare. Kohët e fundit, megjithatë, Turqia është afruar më shumë me aleancën, ndërsa rëndësia e NATO-s për sigurinë e saj është bërë edhe më e dukshme pas tensioneve të fundit në rajon.
