Myrto Uzuni ka zhvilluar një 90 minutësh fantastik në Champions League ndaj Juventusit, ku arriti të shënojë edhe një gol, por në fund ishin kampionët e Italisë ata që triumfuan, ndaj Ferencvaros.
Edhe pse një ndeshje e lehtë në letër, në fushën e lojës nuk ka rezultuar aspak i tillë ky takim për skuadrën e Pirlos, i cili në fund mori kualifikimin për në fazën e ardhshme, por me vështirësi.
Skuadra hungareze kaloi e para në avantazh, me golin e Uzunit, por Ronaldo u përgjigj shpejt, duke barazuar shifrat.
Në pjesën e dytë, bardhezinjtë e rritën presionin për të gjetur golin e fitores, por Ferencvaros u mbrojt mirë dhe me Uzunin në krye të sulmit u treguan edhe të rrezikshëm me dalje të shpejta. Në minutat e shtesës erdhi edhe goli i fitores për Juventusin, i cili u realizua nga Morata.
Me këtë fitore, Juventusi kalon grupin së bashku me Barcelonën, e cila fitoi 0-4 në Ukrainë ndaj Dinamos së Kievit.
9 pikë numëron Dortmundi pas javës së katërt në grupin F, një më shumë se Lazio e vendit të dytë. Bardhekaltrit fituan 3-1 në “Olimpico” kundër Zenit. Ciro Immobile (2x) dhe Marco Parolo ishin autorët e golave për ekipin italian, teksa rusëve nuk u vleu rrjeta e Artem Dzyuba.
Manchester United e kishte detyrë të fitonte në shtëpi dhe tani i duhet një pikë për të siguruar kualifikimin. “Djajtë e kuq” triumfuan me rezultatin 4-1 kundër Basaksehir. Bruno Fernandez e zhbllokoi ndeshjen me një goditje potente në hyrje të zonës, ndërkohë që më pas shënoi edhe golin e dytë.
“Vulën” e vendosi Rashford me golin e tretë me penallti, kurse miqtë në pjesën e dytë shënuan një gol nderi me Turuc. Ky i fundit realizoi nga një goditje dënimi një gol mjaft të bukur. United kryeson me 9 pikë, ndërkohë që PSG e RB Leipzig, që u përballën mes tyre në një ndeshje që u mbyll 1-0 për francezët, numërojnë nga 6 pikë.
Kampionët e Francës ishin të dënuar të triumfonin sonte, në mënyrë që të vijojnë garën për të kaluar fazën e grupeve në Champions League. Një penallti, e kthyer në gol nga Nyemar, i dha fitoren PSG-së, që tani duhet të fitojë ndeshjet në vijim.
