Flamur ‘Alex’ Beqiri, 36 vjeç, u ekzekutua në prag të Krishtlindjes para shtëpisë së tij 1.5 milionë euroshe në Londër, përpara syve të gruas së tij Debora, e cila pa e tmerruar gjithë skenën.
Viktima, një shqiptar nga Kosova, është vëllai i modeles së njohur Misse Beqiri.
Kjo e fundit u bë e njohur në Britani nga pjesmarrja në një reality show dhe ka qenë më parë e martuar me futbollistin Anders Lindegaard. Aktualisht ajo punon si modele dhe është një ndër më të paguarat në botë.
Ekzekutimi i Flamur Beqirit, që njihej si “poducent” muzikor, ka tronditur Londrën, ndërkohë që mediat britanike, pas një investigimi me mediat suedeze, kanë zbuluar të kaluarën e errët të 36-vjeçarit.
Beqiri raportohet se ka qenë i lidhur me disa vrasje mes shqiptarëve në Suedi, gjatë kohës që jetonte atje.
I rritur mes Kosovës e Shqipërisë, ai emigroi kur ishte ende fëmijë në Suedi.
Aty u lidh me mafien e nëntokës suedeze, dhe në vitin 2008 u procedua për futjen e një sasie kokaine me vlerë 2 milionë dollarë në Skandinavi.
Para se të transferohej në Britaninë e Madhe tre vjet më parë, disa nga miqtë dhe bashkëpunëtorët e tij të ngushtë në Suedi u vranë.
Ai ishte shpallur si personi më i kërkuar në Suedi, ndërkohë që nuk u mor vesh si arriti të mos arrestohej dhe për më tepër, të transferohej në Britani, kur deri dy ditë më parë jetonte në dukje i qetë, dhe madje kishte blerë një super shtëpi për 1.5 milionë euro.
Ndërkohë, në Suedi, miku i tij i ngushtë Najef Adawi u plagos rëndë në Malmo ndërkohë që bashkëshortja e Adawit ndërroi jetë nga plagët.
Edhe Najef akuzohej për vepra të ndryshme kriminale në Danimarkë, dhe kishte kaluar 8 vite ne burg.
Beqiri njihej për jetën luksoze.
Ai u martua në vitin 2018 me bashkëshorten e tij Debora Krasniqi, në liqenin e pasanikëve në Itali, Como, në një ceremoni super luksoze, me të ftuar nga disa vende të botës.
Me Deboran u njoh gjatë martesës së të motrës, e cila është një yll dhe personazh i njohur në Britani.
Gjatë një interviste për një revistë britanike, Deborah kishte rrëfyer njohjen me të shoqin, i cili e mori në telefon dhe folën për disa orë pa shkëputje, dhe më pas u takuan.
Policia thotë se për momentin nuk ka ende asnjë të dyshuar për vrasjen e 36-vjeçarit, i cili u ekzekutua ndërsa kthehej në shtëpi bashkë me të shoqen dhe fëmijën e vet.(TemA)
