Prokuroria e Përgjithshme ka njoftuar përmes një deklarate për shtyp se 5 prokurorë kanë dorëzuar dokumentacionin për t’u përzgjedhur në Këshillin e Lartë të Prokurorisë.
Që nga shpallja e vakancave në KLP kanë paraqitur 5 prokurorë që dëshirojnë të bëhen pjesë e këtij institucioni, ku në deklaratë janë bërë të ditur edhe emrat e tyre, të cilët vijnë nga posti si prokurorë pranë Gjykatës së Shkallës së Parë në Tiranë, Vlorë, Berat dhe Durrës.
“Prokuroria e Përgjithshme njoftoi se në përfundim të afatit të përcaktuar datë 31.12.2020, kanë shprehur interes dhe kanë dorëzuar dokumentacionin e kërkuar 5 prokurorë nga prokuroritë e juridiksionit të përgjithshëm.
Prokurorët që kanë dorëzuar dokumentacionin janë Moisi Duda, prokuror, Prokuroria e Apelit, Durrës; Zeqir Hoda, prokuror, Prokuroria pranë Gjykatës së Shkallës së Parë, Tiranë; Eloida Goxhi, prokuror, Prokuroria pranë Gjykatës së Shkallës së Parë, Berat; Albert Kulici, prokuror, Prokuroria pranë Gjykatës së Shkallës së Parë, Vlorë; Elona Avni Alvora, prokuror, Prokuroria pranë Gjykatës së Shkallës së Parë, Vlorë”, thuhet në deklaratë. Prokuroria e Përgjithshme bën me dije se, procesi i votimit për këto kandidatura do të zhvillohet duke zbatuar plotësisht rregullat anti-covid, ndërsa thekson se është konsultuar më parë me institucionet përgjegjës për rregullat kundër koronavirusit.
“Nga ana e Prokurorisë së Përgjithshme po merren të gjitha masat që organizimi i mbledhjes së prokurorëve dhe e gjithë procedura e votimit për anëtarët e KLP-së të zhvillohet në përputhje me rregullat e përcaktuara nga Komiteti Teknik i Ekspertëve, duke shmangur përhapjen e COVID-19. Po ashtu bëhet e ditur se Prokuroria e Përgjithshme i është drejtuar paraprakisht Komitetit Teknik të Ekspertëve për të miratuar organizimin e mbledhjes së përgjithshme të prokurorëve në mjediset e Pallatit të Kongreseve me një kapacitet optimal për zhvillimin e mbledhjes së prokurorëve”, njofton Prokuroria e Përgjithshme. Ndër të tjera bëhet me dije se, pas marrjes së miratimit nga ana e Komitetit Teknik të Ekspertëve do të caktohet menjëherë data e zhvillimit të mbledhjes për të zgjedhur anëtarët prokurorë të Këshillit të Lartë të Prokurorisë.
