Në takimin e sotëm në qarkun Elbasan, Tomor Alizoti – një nga ata politikanë tek të cilët dikur demokratët kishin shpresë, është shprehur me kënaqësi se në zgjedhjet e 11 Majit “do t’i hajë socialistët të gjallë”.
Po problemi është një: Alizoti është vegjetarian. Jo për ndonjë bindje ideologjike, as për ndonjë dietë të përkohshme, por sepse Berisha ia ka hequr dhëmbët këto vitet e fundit. Jo fizikisht, jo, por politikisht. Ka mbetur pa dhëmbë, pa kockë, e pa shtyllë kurrizore – një lloj krijese politike që fshihet tërë kohën, por leh kur i thonë.
I përket asaj shtrese që dikur quhej e përndjekur, por sot është e nënshtruar ndaj një ish-komunisti. Dikur premtonte revolucion, sot lëpihet pas doktorit si qeni pas zotërisë kur hap frigoriferin. E tha vetë në fjalimin e tij pas “kërcënimit kanibal”: “Vazhdo Doktor, se nga ty kanë frikë ata.” Këta “ata” natyrisht janë socialistët, ndërsa ky “ky” është një njeri që nuk fut as frikën në frigorifer pa lejen e Berishës.
Që Alizoti është vegjetarian u provua ‘shkencërisht’ në vitin 2021, kur – sipas burimeve të sigurta të redaksisë sonë – gjatë qëndrimit në fushatë, arrinte të përpijë në një vakt 8 buritos vegjetarianë dhe 13 Coca-Cola të vogla për “trejtje”. Siç thotë vetë, ushqimi me perime është më i lehtë për stomakun dhe më i përshtatshëm për politikanët pa dhëmbë.
Në vend që të hajë kundërshtarët, Alizoti tani ka adoptuar taktikën e rinocerontëve politikë: bërtet shumë, bën pak, dhe shpreson të trembë me hijen e vet. Por zgjedhësit kanë kuptuar se pas çdo deklarate “luftarake”, ai kthehet në çadrën e tij vegane të SHQUP-it për të pirë ndonjë çaj kamomili me Doktorin, duke përtypur heshtjen e radhës.
