Çështja e Teatrit Kombëtar ka shkaktuar debat të gjerë kohët e fundit. Artistët janë ndarë pro dhe kundër prishjes së teatrit.Ndërsa kryeministri i vendit, Edi Rama thotë se, Teatri Kombëtar duhet të prishet dhe në vend të tij të ndërtohet një i ri, me kushte më të mira. Kundër kanë dalë edhe opozitarët me në krye Bashën, Kryemadhin dhe Berishën.
Por një Teatër i ri Kombëtar është dashur të ndërtohej edhe gjatë qeverisë Berisha. Në vitin 2006 qeveria Berisha kishte akorduar 5 milionë e 600 mijë euro për ngritjen e Teatrit Kombëtar dhe Galerinë Kombëtare te Piramida.
U shpall dhe konkursi për projektin me vlerë 300 mijë dollarë dhe u fitua nga studioja amerikane, Luis Beger. Punimet për ndërtimin e teatrit vazhduan deri në fund të vitit 2010.
Në nëntor të 2010-ës, Berisha shprehej se: “Teatri Kombëtar, me një sallë mbretërore, nga më të bukurat në Evropë. E vogël, e bukur, akustike, me një arkitekturë dinjitoze. Fatmirësisht Parlamenti i bëri një rindërtim të shkëlqyer që i përgjigjet në të gjitha aspektet dhe atyre që vijnë dhe dua t’ju informoj se artistët e kanë pritur me kënaqësi shumë të madhe. E kanë vlerësuar shumë.
Dalin nga ato korridoret dhe ato pupulitet dhe vendosen aty ku kushtetuta morale e kombit i vendos ata. Dhe nuk mund të feshitizojmë diçka vetëm e vetëm se është historike, e ardhmja më intereson dhe pastaj historia.”
9 vjet më pas, kur Teatrin e ri kërkon ta ngrejë Rama, opozita dhe Berisha nuk kanë të njëjtin mendim për fetishin dhe të vjetrën.
