Një episod veçanërisht shqetësues është regjistruar në Qytetin Studenti, ku persona të maskuar dhe ende të paidentifikuar kanë sulmuar konviktet, kanë thyer xhama dhe kanë kërcënuar studentët që ndodheshin brenda.
Pamjet ngrenë një pyetje serioze: kush janë këta persona dhe çfarë lidhjeje kanë me protestën? Fakti që persona me fytyra të mbuluara kanë mbërritur deri te godinat ku jetojnë studentët dhe kanë ushtruar presion e dhunë ndaj tyre e zhvendos situatën përtej një proteste të zakonshme.
Konviktet janë ambiente banimi dhe studentët që ndodhen aty nuk mund të ekspozohen ndaj grupeve të paidentifikuara që lëvizin të maskuar dhe godasin godinat. Përveç dëmeve materiale, incidenti krijon një rrezik të drejtpërdrejtë për sigurinë fizike të studentëve dhe shton klimën e frikës në një zonë që duhet të jetë e mbrojtur.
Mbetet ende e paqartë se kush i organizon këto grupe, si kanë arritur të veprojnë në Qytetin Studenti dhe nëse autoritetet kanë identifikuar personat që shfaqen në pamje.
Në një protestë që pretendohet se zhvillohet në emër të studentëve, sulmi ndaj vetë konvikteve dhe kërcënimi i studentëve është një zhvillim që kërkon sqarim të menjëhershëm.