Xhamia e Plumbit, një nga objektet më të veçanta arkitekturore fetare për Shkodrën, do të jetë gati për besimtarët myslimanë shumë shpejt.
Kryetari i bashkisë Shkodër, Benet Beci përcolli sot pamje nga kantieri i punimeve që po kryhen në këtë objekt kulti.
“Rikthim në identitet i Xhamisë së Plumbit, një perlë e çmuar e trashëgimisë së Shqipërisë dhe Ballkanit”, shprehet Beci.
Xhamia e Plumbit është cilësuar si një ndër 50 monumentet më të bukura të botës dhe është xhamia më e madhe e stilit osman që ruhet në Shqipëri, me ndërthurjen edhe të arkitekturave të tjera.
Xhamia është ndërtuar nga Mehmet Pashë Bushati në vitin 1773-1774, duke shërbyer për një kohë të gjatë si xhamia më e madhe e vendit.
Xhamia ka një miksim të arkitekturës turke me atë arabe. Këtë e shohim që në hyrje. Hyn në një oborr të brendshëm i mbuluar me 12 kupola dhe tamburi kryesor që shkon në një lartësi deri në 20 metra. Është xhamia më e lartë në vendin tonë që vjen nga periudha osmane.
Në vitin 1948 Xhamia e Plumbit u shpall monument kulture, duke marrë statusin e mbrojtjes nga shteti.
Në vitin 1967, kur edhe zyrtarisht u ndalua feja në Shqipëri, xhamia pësoi dëmtime, sidomos me rrënimin e minares, ndërkohë në periudha të ndryshme ajo nuk është përdorur zyrtarisht për kryerjen e riteve.
