Gjykata e Tiranës ka nxjerrë nga qelia Viktor Markun dhe Sebastian Malin, të akuzuar për ekzekutimin e Hekuran Billës në qershor të vitit të shkuar në Tiranë.
Marku u arrestua me akuzën e ekzekutimit të Billës, kurse nipi i tij Sebastian Mali dyshohet se ka larguar vrasësin nga vendi i ngjarjes. Prokuroria nuk ka mundur të gjejë prova bindëse për gjykatën për të vijuar gjykimin dhe dhënien e dënimit ndaj tyre.n
Në këtë mënyrë, duke qenë se ka mbaruar edhe afati i paraburgimit të dhënë më parë dhe në pamundësi nga prokuroria për të çuar prova të reja për zgjatjen e tij, gjykata është detyruar që të nxjerrë Markun dhe Malin nga qelia duke i lënë në “arrest shtëpie”.
Ashtu si dy të rinjtë, në qershor të këtij viti doli nga qelia edhe Adiola Lakra, e dashura e Billës që dyshohet se e nxorri në pritë.
Billa u ekzekutua në qershor 2020 në Tiranë dhe sipas prokurorisë, vrasësi ishte Viktor Marku, pasi në vitin 2006, Billa i kishte vrarë atij vëllain në Angli.
