Prokuroria e Posaçme ka nën hetim 47 dosje për abuzimet me tenderat nga institucionet publike.
Ditët e fundit në vendin tonë janë zbuluar afera të mëdha korruptive në lidhje me tenderat nga ministri dhe bashki të papërgjegjshme.
Nisur nga denoncimet e shumta që bëjnë bizneset për procedura jo të rregullta tenderuese, të cilat favorizojnë miqtë e personave në krye të lëvrimit të tenderit, SPAK ka vendosur të nisë hetimet për tendera të tjerë, të cilët dyshohen se janë jo të rregullt dhe po përdoren për përfitime personale, të zyrtarëve të lartë.
Sipas burimeve të gazetës nga SPAK, ky institucion ka aktualisht në duar 47 dosje për tenderat në disa institucione. Ndërkohë, bëhet me dije se dosjet që janë në hetimin e SPAK prekin tendera për projekte mjaft të rëndësishme dhe me zbardhjen e tyre do të ketë goditje të bujshme të zyrtarëve të lartë të korruptuar si ministrja, punonjës dhe drejtorë në Administratën Publike.
Burimet për gazetën treguan se, hetimet për tenderat po trajtohen me imtësi dhe prioritet për shkak të alarmit që është vënë edhe nga vetë kryeministri, Edi Rama, pak ditë më parë. Në këtë kuadër, SPAK garanton se abuzuesit do të mbajnë përgjegjësi për këto shkelje dhe nuk do të ketë tolerime. “Është e garantuar që do të gjenden përgjegjësit.
Është rrezik i dyfishtë edhe për grupet e hetimit që trajtojnë tenderat. Sepse, ose dikush do flasë dhe do tregojë të vërtetën si dhe nga kush u urdhërua, ose ky dikush do mbajë përgjegjësinë e të tjerëve”, tregojnë burimet.
Fokusi tek tenderat në MSH
SPAK tregon se, ka nisur intensivisht punën për hetimet me tenderat në disa ministri. Konkretisht, pas zbulimit të aferave korruptive me tenderat në Ministrinë e Mbrojtjes, SPAK po heton dosje për tenderat në Ministrinë e Shëndetësisë dhe në Ministrinë e Bujqësisë, derisa të gjendet përgjegjësi kryesor.
Sipas të dhënave, hetimet për Ministrinë e Shëndetësisë janë vënë në prioritet pasi është shtuar shumë numri i tenderave gjatë pandemisë, të cilat kapin vlera marramendëse dhe shpesh me kontrata të parregullta. Por, jo vetëm kaq.
SPAK tregon që për tenderat në këtë ministri janë dorëzuar më shumë ankesa si nga qytetarët, por edhe nga kompanitë e skualifikuara padrejtësisht nga gara. Ndërsa në Ministrinë e Bujqësisë janë ngritur më shumë dyshimet dhe kanë filluar hetimet pas skandalit ne Bashkinë Lushnje me tenderat për kanalet vaditës. Ndërkaq, SPAK ka sqaruar se, ankesat e bizneseve pranë APP apo edhe në institucionet të tjera po kthehen në barrë prove për të thelluar hetimet për tenderat, të cilat pritet të sjellin një ndihmë të madhe.
Sipas burimeve, këto ankesa dhe denoncime do të nxisin më shumë luftën antikorrupsion dhe do të vënë para drejtësisë autoritete të larta shtetërore. Kujtojmë këtu se Prokuroria e Posaçme u nxit më së shumti për të filluar hetimet tek tenderat, pas skandalit me tenderin 2.8 miliardë lekë për uniformat e Policisë së Shtetit dhe më pas të vjedhjes që kishte bërë kryetari i Bashkisë Lushnje, Fatos Tushe, me tenderin 226 milionë lekë për kanalet vaditëse, që as nuk kushtojnë aq, por as nuk janë në shërbim të qytetarëve.