Gjykata Kushtetuese ka publikuar dje 3 pyetjet, të cilat ia ka dërguar Komisionit të Venecias për të arritur në një përfundim për kushtetutshmërinë apo jo të zgjedhjeve të 30 qershorit 2019.
Në njoftimin e bërë, Gjykata Kushtetuese bën me dije se pas marrjes në shqyrtim të çështjes, e cila u paraqit nga Shoqata e Bashkive të Shqipërisë për konstatimin antikushtetues të procesit zgjedhor të zhvilluar në 30 qershor 2019, vendosi që të pezullojë gjykimin e kësaj çështjeje dhe të kërkojë një opinion nga Komisioni i Venecias në lidhje me standardet dhe parimet që duhet të merren në konsideratë në çështjen në shqyrtim.
Pasi mori në shqyrtim pyetjet e propozuara që gjykata i ka drejtuar Komisionit të Venecias, nëse ka apo jo kompetencë për të gjykuar kushtetutshmërinë e zgjedhjeve, cili parim duhet të prevalojë, periodiciteti apo pluralizmi dhe a e bënë detyrën partitë dhe institucionet për t’i garantuar shqiptarëve të drejtën e zgjedhjes.
Po ashtu, në njoftim theksohet se nëpërmjet shkresës Gjykata Kushtetuese i është drejtuar Komisionit të Venecias me kërkesën për dhënien e një opinioni amicus curiae, një kopje e plotë e së cilës u është vënë në dispozicion edhe palëve në proces. “Pasi gjykata, vlerësoi edhe pyetjet e propozuara nga palët, ka çmuar të nevojshme të parashtrojë pyetjet e mëposhtme për të sqaruar aspektet kryesore të këtij gjykimi:
Pyetja nr. 1 A mund të interpretohet neni 131, pika 1, shkronja “e”, i Kushtetutës se Gjykata Kushtetuese ka juridiksion për të vlerësuar kushtetutshmërinë e procesit zgjedhor?
Pyetja nr. 2 Duke qenë se parimi i periodicitetit të zhvillimit të zgjedhjeve vendore dhe ai i pluralizmit politik janë parashikuar si parime themelore kushtetuese, cili do të ishte raporti mes tyre në një situatë ku rrezikohet cenimi i secilit parim? Cili parim do të prevalonte mbi tjetrin?
Pyetja nr. 3 Në një situatë të një klime pasigurie juridike, a ka cenuar sjella e autoriteteve publike dhe e partive politike të drejtën e votuesve për të pasur mundësi kuptimplotë zgjedhjeje? A duhej ata të siguronin interesin më të lartë të votuesve”, thuhet në njoftimin e gjykatës.
Shqyrtimi i kërkesës nga Komisioni
Ndërkohë, pas pyetjeve të dërguara nga gjykata, Komisioni i Venecias pritet që të shqyrtojë kërkesën e Gjykatës Kushtetuese për një opinion për zgjedhjet lokale të 30 qershorit, në datën 14 tetor. Komisioni i Venecias do të japë një opinion këshillimor, i cili do të përdoret nga Gjykata Kushtetuese si pjesë argumentuese për të marrë një vendim në lidhje me zgjedhjet lokale të 30 qershorit.
Ishte kryebashkiakja e Shkodrës, Voltana Ademi, ajo e cila ankimoi në Gjykatën Kushtetuese zgjedhjet lokale të 30 qershorit, ku kërkoi që ky proces zgjedhor të mos njihet. Ademi tha se kërkesa e dorëzuar nuk ka të bëjë vetëm me ankimimin e procesit zgjedhor, por edhe me verifikimin e regjistrimit të Bindjes Demokratike.
Ademi paraqiti në Gjykatën Kushtetuese një padi në emër të bashkive të Shqipërisë, e cila tashmë është ish-kryetare pasi pak javë më parë në krye të Shoqatës së Bashkive u vendos Pjerin Ndreu. /SIDORELA BRAÇJA
